Aqmolada bilim berý mekemelerinde órt qaýipsizdigi talaptarynyń buzylǵany anyqtaldy
KÓKShETAÝ. QazAqparat - Aqmola oblysynda órt qaýipsizdigi talaptaryn oryndamaǵan 33 tulǵaǵa jalpy kólemi 853 myń 775 teńge aıyppul salyndy. Bul týraly óńirlik kommýnıkatsııalar qyzmetinde ótken baspasóz qyzmetinde Aqmola oblysy boıynsha TJD órt qaýipsizdigi salasy boıynsha baqylaý-profılaktıkalyq qyzmet basqarmasynyń basshysy, azamattyq qorǵanys polkovnıgi Denıs Shelkoplıasov aıtty, dep habarlaıdy QazAqparat tilshisi.
Denıs Shelkoplıasovtyń aıtýynsha, oblys aýmaǵyndaǵy bilim berý nysandary jyl saıyn órt qaýipsizdigine tekseriledi.
«Jalpy, oblys aýmaǵynda 855 bilim berý nysany ornalasqan. Olardy tekserý kezinde órtti anyqtaý jáne sóndirý júıesiniń, órt sóndirý quraldary jáne órtke qarsy sýmen jabdyqtaý, evakýatsııa jáne peshpen jylytý joldarynyń, sondaı-aq elektr jelileriniń jaǵdaıyna nazar aýdaryldy.
Tekseris qorytyndysy boıynsha órt qaýipsizdigi erejesine saı 111 nysannyń jumys istep turǵany anyqtaldy. Onyń ishinde 79-y jalpy bilim berý mekemeleri, 1-i ınternat, 27-i balalardyń mektepke deıingi mekemesi jáne 4-i kolledj.
Sonymen qatar, órt qaýipsizdigi salasynda ereje jáne tehnıkalyq reglamenttiń buzylǵany da belgili boldy.
«Órt qaýipsizdigi talaptaryn buzǵan 631 tulǵa ákimshilik jaýapkershilikke tartyldy, 598 adamǵa eskertý jasaldy jáne 33 tulǵaǵa jalpy kólemi 853 myń 775 teńge aıyppul salyndy. Bul baǵyttaǵy jumystar odan ári jalǵasýda», - dep atap ótti Denıs Shelkoplıasov.
