Aqmolada balalar lagerlerinde órt qaýipsizdigi erejeleriniń saqtalmaǵany anyqtaldy
Oblystyq TJD baspasóz qyzmetiniń málimetinshe, 2022 jyldyń ótken kezeńinde Aqmola oblysynda 429 órt tirkelgen. Órttiń qaýipti faktorlarynan 17 adam qaza taýyp, jeteýi jaraqat aldy. Iis tıip, ýlanýdan bir adam kóz jumyp, úsheýi jaraqat aldy. Osy rette, jazǵy kezeńde balalardyń saýyqtyrý lagerlerindegi órt qaýipsizdigine erekshe kóńil bólinip otyr.
«Departamenttiń esebinde barlyǵy 17 balalardy saýyqtyrý lageri tur, onyń ishinde aǵymdaǵy jyly 13 balalar saýyqtyrý lageri qyzmetin júzege asyrady. Jumys istep turǵan lagerlerdiń ishinen tórt nysanda órt qaýipsizdigi erejeleriniń saqtalýyna tekseris júrgizildi. Onyń ishinde 25 zań buzýshylyq anyqtalyp, eskertý túrinde tórt laýazymdy tulǵa ákimshilik jaýapqa tartyldy», - deıdi departament basshysynyń orynbasary M.Shapaǵatov.
Vedomstvodan atap ótkendeı, balalardyń jazǵy lagerlerine júrgizilgen tekseris barysynda órtti anyqtaý jáne sóndirý júıeleriniń bolýy men jumysqa qabilettiligine, obektilerdiń alǵashqy órt sóndirý quraldarymen qamtamasyz etilýine, evakýatsııalaý joldarynyń bolýy men jaı-kúıine, obektilerdiń órtke qarsy sýmen jabdyqtalýymen qamtamasyz etilýine, sondaı-aq elektr jelileriniń tehnıkalyq jaı-kúıine erekshe nazar aýdaryldy. Tekserý júrgizý barysynda qyzmetkerlermen órt týyndaǵan jaǵdaıda is-qımyl boıynsha 52 nusqama jáne 13 oqý-jattyǵý ótkizildi.
Aıta ketsek, budan buryn Zerendide qatty jel turyp, 8 turǵyn úıdiń shatyryn ushyryp áketken bolatyn.
Foto: nellen.biz
