Aqmolada azyq-túlik óndirisi boıynsha 92 ınvestıtsııalyq joba qolǵa alyndy

ASTANA. QazAqparat – Aqmola oblysynda agrarlyq salaǵa 106 mlrd teńge bólingen. Bul týraly óńir ákimi Ermek Marjyqpaev aıtyp berdi, dep habarlaıdy QazAqparat tilshisi.

«Memleket basshysynyń azyq-túlik qaýipsizdigin qamtamasyz etý jónindegi tapsyrmasyn oryndaý sheńberinde 2026 jylǵa deıin oblysta 306 mlrd teńgege 92 mańyzdy ınvestıtsııalyq jobany iske asyrý josparlanýda. Ol 260 myń tonnadan astam un men jarma ónimderin, 62 myń tonnaǵa barlyq et túrlerin, jylyna 54 myń tonnaǵa ósimdik maıyn, 45 myń tonnaǵa shıki sút jáne 10 myń tonnaǵa kókónister óndirisin ulǵaıtýǵa múmkindik beredi», - dedi oblys ákimi ortalyq kommýnıkatsııalar qyzmetinde ótken eseptik brıfıngte.

Spıkerdiń aıtýynsha, etti jáne sútti mal sharýashylyǵyn odan ári damytý aıasynda, bıyl 2,5 myń iri qara mal alý arqyly 46 etti ferma jáne 4 myń iri qara malǵa 11 sútti-taýarly ferma qurylady.

«Bizdiń oblysta qus sharýashylyǵy boıynsha úlken áleýet bar. «Makınka qus fabrıkasy» respýblıkadaǵy iri kásiporyndardyń biri, ol týraly joǵaryda atap ótken bolatynmyn.

Qus fabrıkasynyń ekinshi kezegi iske qosylǵan soń, kásiporyn bir jylda tolyq qýattylyqqa shyqty, ol shamamen 60 myń tonna qus eti. Oǵan qosa, 1,5 myń jańa jumys orny ashylyp, qus fabrıkasy ornalasqan Bulandy aýdanynda jumyspen qamtý kórsetkishi kóterildi, halyqtyń jaǵdaıy jaqsardy», - deıdi ákim.

Bıylǵy sáýirde qus fabırkasynyń úshinshi kezegi salynyp bitedi.

Bul shamamen 500 adamdy jumysqa ornalastyrý arqyly qus eti boıynsha óndiristik qýatty jylyna 90 myń tonnaǵa deıin arttyrýǵa múmkindik bermek.

«Osy jáne basqa da jetistikterge, tıisti memlekettik qoldaýdyń nátıjesinde qol jetkizildi. Bıyl agrarly salaǵa shamamen 106 mlrd teńge bólindi. Osylaısha, memleket tarapynan qoldaý kórsetiledi jáne dıqandar úshin barynsha qolaıly jaǵdaı jasalýda», - dedi Ermek Marjyqpaev.