Aqmolada Áýe shabýylyna qarsy qorǵanys áskerleriniń sarbazdary áskerı ant berdi
ASTANA. KAZINFORM — Aqmola garnızonynda Áýe shabýylyna qarsy qorǵanys áskerleriniń sarbazdary Otanǵa adal qyzmet etýge ant berdi. Saltanatty shara 44813 áskerı bóliminiń saptyq alańynda ótti. Bul týraly Qorǵanys mınıstrligi habarlady.
Іs-sharaǵa komandırler, áskerı qyzmetshiler, Qarýly kúshterdiń ardagerleri, sondaı-aq sarbazdardyń týǵan-týystary men jaqyndary qatysty.
Saltanatty is-sharany Áýe qorǵanysy kúshteri bas qolbasshysynyń jaýyngerlik daıyndyq jónindegi orynbasary avıatsııa general-maıory Rýslan Qońyrov ashty.
— Búgin sizder ózderińizge zor ári mártebeli mindet qabyldap otyrsyzdar. Otan sizderge senim artyp, áýe keńistigin qorǵaýdy tapsyrdy. Bergen anttaryńyzǵa adal bolyp, qyzmetterińizdi abyroımen atqaryp, Otan qorǵaýshysy degen joǵary ataqqa laıyq bolýlaryńyzǵa tilektespin, — dedi ol.
Jaýapty ári tolqynysty rásim Memlekettik Tý men bólimniń Jaýyngerlik Týy aldynda qatań áskerı dástúrlerge saı ótti. Aqmola, Túrkistan oblystary men Astana qalasynan shaqyrylǵan 170 jas jaýynger antqa adal bolýǵa jáne Otandy qorǵaýǵa árdaıym daıyn ekendikterine sert berdi.
Qyzmettiń bir aıy ishinde sarbazdar jas jaýynger kýrsynan ótti. Olar jalpyáskerı jarǵylardy meńgerip, qarý-jaraqtyń taktıkalyq-tehnıkalyq sıpattamalarymen tanysty, saptyq jáne atys daıarlyǵynan ótti.
— Bul kúnge biz muqııat daıyndaldyq. Komandırler bizben jeke-jeke jumys istedi. Іs-shara óte tolqynysty boldy, biraq bári sátti ótti. Alda — qyzmet pen jaýyngerlik daıarlyqtyń jańa kezeńderi tur. Bir jyl kózdi ashyp-jumǵansha óte shyǵady dep oılaımyn, — dedi qatardaǵy jaýynger Baqytjan Qasenov.
Qatardaǵy jaýynger Janbolat Janbyrshınniń ájesi Bazarkúl Qurmanbaeva nemeresine degen maqtanysh sezimin jasyra almady.
— Janbolatty áskerı kıimmen ant berip turǵan sátin qýanysh pen tolqynysqa toly sezimmen tamashaladym. Eń bastysy — aman-esen qyzmet etip, áskerı boryshyn abyroımen atqarsyn, — dedi ol.
Rásim sońynda ofıtserler, serjanttar men sarbazdar týdy alyp júretin toptyń bastaýymen plats boıymen saltanatty marshpen júrip ótti.
Odan keıin bólim qonaqtaryna sarbazdardyń qandaı jaǵdaıda qyzmet atqaryp júrgenin kórýge jáne ózderin qyzyqtyrǵan suraqtarǵa jaýap alýǵa múmkindik berildi.
Budan buryn «Batys» óńirlik qolbasshylyǵynyń Aqtaý garnızonyndaǵy teńiz jaıaý áskerleri brıgadasy men Beıneýdegi barlaý polkiniń jas jaýyngerleri Otanǵa adal qyzmet etýge ant qabyldaǵanyn jazǵanbyz.