Aqmolada asyl tuqymdy sıyr urlaǵan malshy men onyń tanysy ustaldy
KÓKShETAÝ. QazAqparat - Aqmola oblysynyń Ereımentaý aýdanynda asyl tuqymdy úsh bas iri qara urlanyp, mal ıesine 1,5 mıllıon teńge shyǵyn keltirildi, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, mal urlyǵy aǵymdaǵy jyldyń tamyz aıynda Ereımentaý aýdanyndaǵy sharýashylyqtardyń birinde bolǵan. Jedel izdestirý sharasy barysynda aýdan aýmaǵynda aberdın-angýs tuqymdy úsh bas iri qaranyń joǵalǵany anyqtaldy. Sharýashylyq basshysyna keltirilgen shyǵyn kólemi 1,5 mıllıon teńgeden astam dep baǵalandy.
«Qylmysqa sharýashylyq malshysy men onyń tanysynyń qatysy bar bolyp shyqty. Tártip saqshylary kúdiktilerdiń bir aı ishinde asyl tuqymdy úsh bas maldy urlap, etke ótkizgenin anyqtady. Aıǵaq retinde polıtsııa qyzmetkerleri kúdiktilerden urlanǵan maldyń terisin tárkiledi jáne qylmystaryn moıyndaǵany týraly túsinikteme aldy», - deıdi Aqmola oblystyq PD baspasóz qyzmetindegiler.
Vedomstvodan atap ótkendeı, malshynyń atalmysh seriktestik aýmaǵynda oryn alǵan ózge qylmysqa da qatysty bary anyqtaldy. Malshy sharýashylyqqa tıesili 7 bas buzaýdy urlap, onyń 4-in satyp jibergen.
«Qazirgi kezde barlyq oqıǵa boıynsha qylmystyq is qozǵalyp, sotqa deıingi tergeý amaldary júrgizilýde», - dep tolyqtyrdy vedomstvodan.
