Aqmolada astyq tasymaldaý máselesi talqylandy
KÓKShETAÝ. QazAqparat - Aqmola oblysynda astyq jáne astyq ónimderin jóneltý, tasymaldaý jáne astyq qabyldaý oryndaryna jetkizip berý boıynsha is-qımyldy úılestirý jáne qamtamasyz etý máseleleri boıynsha shtab qurylyp, jumys isteýde. Bul týraly óńirlik kásipkerler palatasynda ótken brıfıngte aıtyldy, dep habarlaıdy QazAqparat tilshisi.
Bıylǵy jyly da oblysymyzda egin bitik shyǵyp, el yrzyǵy molaıǵaly tur. Oblystyq aýyl sharýashylyǵy basqarmasynyń deregi boıynsha bıyl óńirde 5,5 mıllıon tonnaǵa jýyq astyq jınalady degen boljam bar. Al endi sol mol astyqty der kezinde jınap, saqtap, keptirip, ıgilikke asyrý da ushan-teńiz jumys. Bıylǵy aýa raıynyń erekshelikterine baılanysty jaıqalyp shyqqan egindi ýaqtyly oryp, mol astyqty ysyrapsyz jınap alý máselesi de úlken jaýapkershilikti qajet etip tur.
«Osy maqsatta 2017 jyldyń qarasha aıynda «Atameken» QKP men («Qazaqstan temir joly - júk tasymaly» AQ-nyń arasynda aýyl sharýashylyǵy ónimderin respýblıka ishinde jáne eksportqa syrtqa tasymaldaýdy uıymdastyrý týraly áriptestik boıynsha kelisim jasaldy. Osy maqsatta aǵymdaǵy jyldyń shilde aıynda astyq jáne astyq ónimderin jóneltý, tasymaldaý jáne astyq qabyldaý oryndaryna jetkizip berý boıynsha is-qımyldy úılestirý jáne qamtamasyz etý máseleleri boıynsha shtab quryldy. Oǵan jergilikti atqarýshy organdardyń, memlekettik kiris organdarynyń, «Qazaqstan temir joly» UQ» AQ-nyń qurylymdyq bólimsheleriniń jáne óńirlik kásipkerler palatasynyń qatysýymen jumys shtaby quryldy», - dep atap ótti Aqmola óńirlik kásipkerler palatasynyń dırektory Tımýr Nahıpbekov brıfıngte.
Buǵan qosa, kásipkerlerden basqa, «QTJ - Júk tasymaly» AQ, «Astyq Trans» AQ jáne olardyń qurylymdyq bólimsheleriniń basshylyǵymen biryńǵaı WhatsApp-chaty quryldy. Sol sebepti kásipkerler ózderiniń suraqtary jáne problemalary bolsa Call-ortalyqqa, jedel jeli: 7 (7162) 722-547, 292-712 («Qazaqstan temir joly - júk tasymaly» AQ-nyń Aqmola oblystyq fılıaly) nemese 7 7017987488 (vatsap) telefon nómiri arqyly habarlasa alady.
Sonymen qatar, «Qazaqstan temir joly - júk tasymaly» AQ-nyń Aqmola oblystyq fılıaly dırektorynyń orynbasary Balǵabek Aqpeıisov astyq tasymaldaýǵa vagondar quramy jetkilikti ekenin aıtyp, byltyrǵy jylǵa jaǵdaı qaıtalanbaıtynyn jetkizdi.
«Vagondar bizde jetkilikti. Qazir bir qosymsha Belarýs, Grýzın jáne Ázerbaıjan elderinen astyq tasymaldaýshylaryn tartý máselesin qarastyratyn bolamyz. Sondyqtan, astyq tasymaldaýda másele týyndamaýy tıis. Oǵan qosa, biz jabyq vagondardy paıdalanatyn bolamyz. Qazirgi kezde Alashonkoý arqyly Qytaı baǵytynda júk jóneltý synyqtan ótkizilip jatyr. Oraq naýqany kezinde bizge Reseı, Ýkraına jáne Belarýs elderiniń qozǵalmaly quramy jetkiziledi. Sondaı-aq, konteıner arqyly tasymaldaý da qolǵa alynýda. Jyl basynan beri 1070 astam vagonǵa júk tıeldi, bul 2200 konteıner. Bul óte qolaıly. Jalpy, aıtqanda astyq tasymalynyń kólemi ulǵaıtyla bermek», - dep tolyqtyrdy Balǵabek Aqpeıisov.
