Aqmolada arnaıy tehnıkany alyp júrgen patrýldik kólik apatqa ushyrady
ASTANA. KAZINFORM — Aqmola oblysyndaǵy Astana — Petropavl tasjolynda patrýldik polıtsııa kóliginiń qatysýymen jol-kólik oqıǵasy boldy. Saldarynan polıtsııa qyzmetkeri jaraqat alyp, medıtsınalyq mekemege jetkizildi, dep habarlaıdy Kazinform tilshisi.
Patrýldik kólik qatysqan jol apatynyń vıdeosy áleýmettik jelidegi birneshe jergilikti pablıkte jarııalandy.
Aqmola oblystyq polıtsııa departamentiniń baspasóz qyzmetiniń málimetinshe, atalǵan jol-kólik oqıǵasyna baılanysty qylmystyq is qozǵaldy.
— 3 qarashada Astana — Petropavl avtojolynda patrýldik polıtsııa kóliginiń qatysýymen jol-kólik oqıǵasy boldy. Aldyn ala málimet boıynsha, JAC T9 avtokóliginiń júrgizýshisi jyldamdyq rejımi men araqashyqtyqty saqtamaı, jol qozǵalysy qaýipsizdigin qamtamasyz etip, arnaıy jol tehnıkasyn alyp júrý mindetin atqaryp júrgen polıtsııanyń qyzmettik kóligimen soqtyǵysqan, — dep túsindirdi vedomstvodan.
Jol apaty saldarynan polıtsııa qyzmetkeri jaraqat alyp, medıtsınalyq mekemege jetkizilgen.
— Qazirgi ýaqytta sotqa deıingi tergeý júrgizilip, oqıǵanyń barlyq mán-jaıy anyqtalyp jatyr, — dep tolyqtyrdy polıtsııa.
Buǵan deıin Aqmola oblysynda tas jolda bolǵan jol apatynan úsh adam qaza tapqanyn jazǵan bolatynbyz.
