Aqmolada áleýmettik mańyzy bar azyq-túlik taýarlarynyń baǵasy ósti

KÓKShETAÝ. QazAqparat - Aqmola oblysynda kúrish, makaron, taýyq eti, súzbe, jumyrtqa, kúnbaǵys jáne maı, qyryqqabat, sábiz jáne pııazdyń ortasha baǵasy kóterildi. Bul týraly Óńirlik kommýnıkatsııalar qyzmetinde ótken brıfıngte Aqmola oblysynyń kásipkerlik jáne týrızm basqarmasynyń basshysy Erbol Ospanov málim etti, dep habarlaıdy QazAqparat tilshisi.

Basqarma basshysynyń aıtýynsha, jyl basynan beri baǵalar orta eseppen 2,2 paıyzǵa ósken. Al qaraqumyq jarmasynyń baǵasy – 10,7 paıyzǵa, 1 – surypty nan-10,4 paıyzǵa, qant-5,7 paıyzǵa tómendegen.

«Áleýmettik mańyzy bar azyq-túlik taýarlarynyń ortasha baǵasy ósti, onyń ishinde kúrish - 11,9 paıyz, makaron – 7,2 paıyz, taýyq eti – 0,9 paıyz, súzbe - 5,9 paıyz, jumyrtqa - 4,7 paıyz, sary maı – 7,8 paıyz, kúnbaǵys maıy – 4,2 paıyz, qyryqqabat – 9,1 paıyz, pııaz-41,3 paıyz, sábiz-0,8 paıyz. Baǵanyń ósýiniń negizgi sebepteri shıkizatqa, jemge, janar-jaǵar maıǵa, tehnıkaǵa jáne onyń qosalqy bólshekterine, jabdyqtar men jınaqtaýyshtarǵa, sondaı - aq veterınarııalyq preparattarǵa, premıksterge shyǵyndardyń ulǵaıýyna baılanysty taýar óndirýshilerdiń satý baǵasynyń ósýi bolyp tabylady», - dep atap ótti Erbol Ospanov.

Basqarma basshysy atap ótkendeı, oblysta áleýmettik mańyzy bar azyq-túlik taýarlarynyń baǵasy turaqtandyrý boıynsha birqatar sharalar júzege asyrylýda.

«Baǵany turaqtandyrýǵa oblystyq bıýdjetten barlyǵy 4,2 mlrd teńge, onyń ishinde «aınalym shemasyna» - 3,7 mıllıard teńge bólindi. Jalpy, oblysta 2992 tonna kóleminde taýarlar qory bar, forvardtyq sharttar sheńberinde 5275 tonnaǵa kelisimshart jasaldy. Taýarlardy satý 45 saýda núktesi arqyly júzege asyrylady. «Aınalym shemasy» boıynsha taýarlardyń alty túri (sút, aıran, súzbe, sary maı, qant) boıynsha jalpy somasy 1,5 mıllıard teńgege zaım berildi, sondaı-aq taýarlardyń tórt túri boıynsha 912,5 mıllıon teńgege (taýyq eti, kartop, 1-surypty un, kúnbaǵys maıy) zaım berý maquldandy», - dep tolyqtyrdy Erbol Ospanov.

Aıta ketsek, jyl basynan beri oblysta taýar óndirýshilermen jáne saýda obektilerimen baǵany turaqtandyrý týraly 859 kelisimshart jasaldy, 51 jármeńke ótkizildi, barlyǵy 49 mıllıon teńgeniń taýary satyldy.

Búgingi kúni turaqtandyrý qorynda 1 sortty unnyń 1 kg – 210 teńgege, kúrish 1 kg – 340 teńgege, qant 1 kg – 465 teńgege, qaraqumyq jarmasy 1 kg – 465 teńgege, makaron 1 kg – 286 teńgege, kúnbaǵys maıy 5 l – 4250 teńgege, tuzdyń býmasy – 50 teńgege, sarymasaq 1 kg – 172 teńgege, kartop 1 kg – 120 teńgege, sábiz 1 kg – 90 teńgeden satylýda.