Aqmolada alaıaq áıel «qarjy pıramıdasyn» quryp, ózi shetel asyp ketken
KÓKShETAÝ. QazAqparat – Aqmola oblystyq polıtsııa departamentinde «qarjy pıramıdasyn» qurǵan kúdiktilerdi ustaý úshin arnaıy tergeý toby quryldy. Bul týraly PD bastyǵy, general-maıor Armanbek Baımýrzın azamattardy jeke qabyldaýynda aıtty, dep habarlaıdy QazAqparat tilshisi vedomstvonyń baspasóz qyzmetine silteme jasap.
«Ótken jyly Kókshetaý qalasynda turatyn eki áıel alaıaq qyz qurǵan «qarjy pıramıdasynan» japa shekken. Kúdikti WhatsApp messendjeri arqyly birneshe top ashyp, jobaǵa aqsha salý arqyly tabys tabýǵa bolatynyn aıtyp, jurtty tartqan. Alaıaqtyń sózine senip qalǵan turǵyndar aıtqan somasyn aýdarǵan. Alaıda, «qarjy pıramıdasyn» qurýshy osy kúni Reseı aýmaǵynda júr, al salymshylar oǵan salǵan aqshasyn da, ústeme tabysyn da qaıtaryp alǵan joq. Aldanǵanyn túsingen áıeldermen birge ózge zardap shegýshiler de polıtsııaǵa aryz jazyp, kómek surady», - deıdi vedomstvodan.
Aryzdanýshylardyń sózin tyńdaı kele Armanbek Baımýrzın «qarjy pıramıdasyn» qurǵan kúdiktilerdi ustaý úshin arnaıy tergeý toby qurylǵanyn, sondaı-aq, istiń barysyn jeke baqylaýyna alǵanyn atap ótti.
Onyń aıtýynsha, qazirgi kezde tergeýshiler tarapynan qoldanystaǵy zańnama sheńberinde keshendi tergeý sharalary júzege asyrylýda. Zardap shekkender tergeý sharalarynyń barysy týraly bilip otyra alady.
«Óńirdiń kez kelgen turǵyny polıtsııa departamentiniń bastyǵyna quqyq qorǵaý organdarynyń jumysyna qatysty óz saýalyn qoıyp, tıisti jaýabyn ala alady», dep tolyqtyrdy vedomstvodan.
