Aqmolada adasyp ketken 71 jastaǵy keıýana tabyldy
KÓKShETAÝ. QazAqparat – Aqmolalyq polıtseıler 71 jastaǵy este saqtaý qabileti nashar zeınetkerdi izdep tapty, dep habarlaıdy QazAqparat tilshisi aımaqtyń polıtsııa departamentiniń baspasóz qyzmetine silteme jasap.
Polıtseılerdiń aıtýynsha, Kókshetaý polıtsııa basqarmasyna 73 jastaǵy jergilikti turǵyn júgingen. Ol 71 jastaǵy sińilisiniń joǵalyp ketkenin málimdegen. Polıtseıler azamatshanyń este saqtaý qabileti nashar ekenin anyqtady.
«11 qańtar kúni zeınetker serýendeýge shyǵyp, úıine qaıta oralmaǵan. Kezekshilik bólimniń qyzmetshileri dereý qarııany izdeý jumystaryna qylmystyq jáne patrýldik polıtsııany jumyldyrdy. Áıeldi túnimen izdegen patrýl polıtseıleri ony oblys ortalyǵyndaǵy saýda úıi mańynan tapqan. Zeınetker mekenjaıyn umytyp, túndi kópqabatty úıdiń podezinde ótkizgen»,- dedi mekemedegiler.
Jalpy, 2019 jyly Aqmola oblystyq PD qylmystyq polıtsııa basqarmasyna iz-túzsiz joǵalyp ketkenderge qatysty 85 aryz túsken. Onyń 75-i tabyldy.
