Aqmolada «Abaı danalyǵy sal-seriler elinde» mereıtoı sharalarynyń ashylýy boldy

KÓKShETAÝ. QazAqparat – Abaı dáýirinde ómir súrgen daýylpaz aqyn Birjan saldyń týǵan jerinde «Qutty qonaq» jobasy sheńberinde «Abaı danalyǵy sal-seriler elinde» atty mereıtoılyq sharalardyń ashylýy boldy, dep habarlaıdy QazAqparat tilshisi aýdan ákimdigine silteme jasap.

Abaı hakimniń 175 jyldyq mereıtoıyn toılaý Málik Ǵabdýllın mýzeıiniń muryndyq bolýymen, sondaı-aq Birjan sal aýdany Stepnıak qalasyndaǵy Abaı Qunanbaev atyndaǵy orta mektep oqýshylary jáne mýzeı qyzmetkerleriniń qatysýymen «Júregimniń túbine tereń boıla» atty ədebı-tanymdyq keshpen bastaldy.

Budan ári shara «Abaı danalyǵy sal-seriler mekeninde» atty ádebı sazdy keshke ulasty. Kesh sózdiń piri Abaı hakim men ánniń piri Birjan saldyń ómirdegi kezdesýleri kórinis tapqan prologpen bastaldy. Іs-shara barysynda Birjan sal aýdanynyń ákimi Ermek Nuǵymanov jáne Málik Ǵabdýllın mýzeıiniń dırektory Qudaıberli Myrzabek quttyqtaý sóz sóılep, osyndaı ǵıbratty sharalar arqyly Abaıdyń álemine tereń boılaı alatyndyǵymyzdy tilge tıek etti.

«Ýaqyt ótip, qoǵamdyq sana ózgergenimen Abaı shyǵarmalary óziniń ózektiligin joǵaltpaıdy. Onyń baı shyǵarmalary qazaq halqynyń tarıhı jáne mádenı murasy bolyp qala beredi», - dedi aýdan ákimi Ermek Nuǵymanov.

Sharada aıtylǵandaı, «Qutty qonaq» jobasy áli de óz jalǵasyn tabady. Joba barysynda túsirilgen beıne jazbalar jyl aıaǵynda derekti fılmge ózek bolmaq.