Aqmolada 79 jastaǵy múgedek qarııany tonaǵan kúdiktiler ustaldy
KÓKShETAÝ. QazAqparat - Aqmola oblysynda 79 jastaǵy múgedek qarııany tonaǵan kúdiktiler ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimeti boıynsha, 2019 jylǵy naýryzdyń 5-de Kókshetaý qalalyq PB kezekshi bólimine oblys ortalyǵynyń 79 jastaǵy turǵyny habarlasyp, belgisiz bireýlerdiń tonap ketkenin aıtqan. Keıýana kardıologtyń esebinde tur.
Zardap shegýshiniń sózinshe, dárigerdiń kelýin kútip otyrǵandyqtan ol úıdiń esigin ashyq qaldyrǵan.
«Medıtsına qyzmetkeriniń kelýin kútip otyrǵan qarııa qalǵyp ketken. Keıin qatty tarsyldan oıanǵan kezinde úıdiń ishinde bógde adamdardyń júrgenin kóredi. Beıtanys er adamdardyń arsyzdyǵynan qarııanyń densaýlyǵy kúrt nasharlap ketken. Keıin shkaftyń ishinde saqtaýly turǵan aqshasynyń joqtyǵyn baıqaǵan ájeı polıtsııaǵa aryzdandy», - dep atap ótti PD baspasóz qyzmetindegiler.
Oqıǵa ornyna dereý jedel tergeý toby jetti. Kóz uzamaı kúdiktiler de qolǵa tústi.
«Kúdiktiler buryn sotty bolǵan Kókshetaý qalasynyń turǵyndary bolyp shyqty. Olar qylmysyn moıyndap, urlanǵan aqshanyń bir bóligin ıesine qaıtardy. Oqıǵaǵa baılanysty QR QK «Tonaý» baby boıynsha is qozǵaldy», - dep tolyqtyrdy vedomstvodan.
