Aqmolada 6 balabaqsha, 14 mektep salynyp jatyr – ákim

ASTANA. QazAqparat – Aqmola oblysynda 85 mekteptiń jóndeý jumystaryna oblys qazynasynan 8,6 mlrd teńge bólindi. Oblystaǵy bilim ordalarynyń jaı-kúıi týraly óńir ákimi Ermek Marjyqpaev aıtyp berdi, dep habarlaıdy QazAqparat tilshisi.

Onyń aıtýynsha, mektepke deıingi jáne orta bilim berý – mańyzdy sala bolyp qalyp otyr.

«Eki jastan alty jasqa deıingi balalardy mektepke deıingi oqytýmen jáne tárbıeleýmen 100% qamtý boıynsha mindetterdi sheshý jalǵasyp jatyr. Qazir oblys boıynsha bul kórsetkish 86% quraıdy, jyl sońyna deıin ony 88%-ke jetkizý josparlanǵan. Bıyl 313 orynǵa 2 balabaqsha ashyldy, 1706 oryndyq taǵy 6 balabaqshanyń qurylysy jalǵasyp jatyr», - dedi E. Marjyqpaev ortalyq kommýnıkatsııalar qyzmetinde ótken brıfıngide.

Sonymen birge, óńir ákimi mektepterdiń ınfraqurylymyn damytý bilim berý sapasyna tikeleı yqpal etetinin atap ótti.

«Bıyl «Jumyspen qamtýdyń jol kartasy» jáne «Aýyl – el besigi» baǵdarlamasy aıasynda 85 nysanǵa kúrdeli jáne kezekti jóndeý júrgizý úshin oblystyq bıýdjetten 8,6 mlrd teńge bólindi, ol ótken jylǵy deńgeıden úsh ese artyq. 5,5 myń oqýshy ornyna 14 mekteptiń, sonymen qatar úsh aýysymdy oqytýdy joıý sheńberinde 2 mekteptiń qurylysy jalǵasýda. Onyń ishinde, jyl sońyna deıin 2 myńnan astam oqýshy ornyna 7 mektep paıdalanýǵa beriledi jáne 2024 jyly taǵy 7 mektep ashylady», - dedi ákim.

Sonymen qatar, oblysta «Jaıly mektep» ulttyq jobasy aıasynda 2025 jylǵa deıin 26,5 myń oqýshy ornyna 20 mektep salý josparlanǵan.