Aqmolada 4773 otbasy ataýly áleýmettik kómek aldy
Aqmola oblystyq jumyspen qamtýdy jáne áleýmettik baǵdarlamalardy úılestirý basqarmasynyń málimetinshe, bıyl oblys boıynsha barlyǵy 6 myńnan astam áleýmettik jaǵynan az qamtylǵan otbasy ataýly áleýmettik kómek alýda. Bıyl ataýly áleýmettik kómek kólemi 9 esege artyp, 3,7 mıllıard teńgeni qurady.
«Elbasynyń «Áleýmettik qamqorlyq» jańa áleýmettik sharalaryn júzege asyrý sheńberinde 2019 jyldyń 1 sáýirinen bastap, oblys boıynsha ataýly áleýmettik kómek alý úshin 8 myńnan astam azamat júgindi. Olardyń barlyǵyna tıisti túsinikteme berildi», - deıdi Aqmola oblystyq jumyspen qamtýdy jáne áleýmettik baǵdarlamalardy úılestirý basqarmasynyń basshysy Dına Ahmetjanova.- Bıylǵy jyldyń sáýir jáne mamyr aıynda ataýly áleýmettik kómek taǵaıyndaý úshin 6400 ótinish tústi. Onyń ishinde 120 otbasynyń ótinishinen bas tartyldy. 6058 ótinish maquldanyp, 9 888 bala tárbıelep otyrǵan kópbalaly 2104 otbasyna ataýly áleýmettik kómek taǵaıyndaldy. 4773 myń otbasy 626,5 mıllıonnan astam teńge kóleminde áleýmettik kómek aldy. 178 otbasyn ýchaskelik komıssııa tekserip jatyr.
Sonymen qatar, ataýly áleýmettik kómekten bólek áleýmettik jaǵynan az qamtylǵan jáne kópbalaly otbasylardy qoldaý maqsatynda oblystyq jáne jergilikti bıýdjetten 5,5 mıllıard teńge qarjy qarastyrylyp otyr. Qarajat tartý esebinen bıylǵy jyldyń 3 aıynda 4139 otbasyna 57 mıllıon teńge kómek kórsetildi. «Nurly jer» baǵdarlamasy sheńberinde 20 jaldamaly jána 12 nesıelik turǵyn úı salynýda.
«Jyl sońyna deıin 148 kópbalaly otbasyn jaldamaly baspanamen qamtý josparlanyp otyr. Budan bólek oblystyń 9 óńirinde shildeniń sońynda osy sanattaǵy 28 otbasyna jaldamaly páter satyp áperý josparlanǵan.
Sonymen qatar, óńir kásipkerleri jyl sońyna deıin 41 áleýmettik jaǵynan az qamtylǵan jáne kópbalaly otbasynyń baspana máselesin sheshýge kómektespekshi. Búgingi kúni oblystyń 10 óńirinde osyndaı 18 otbasy baspanamen qamtyldy, - dep toltyrdy basqarma basshysy.
