Aqmolada 3 jumysshy káriz qudyǵynda metanoldan ýlanyp, bireýi kóz jumdy
KÓKShETAÝ. QazAqparat - Aqmola oblysynda qaýipsizdik tehnıkasy erejesin saqtamaǵan kommýnaldyq kásiporyn jumysshysy kóz jumdy, dep habarlaıdy QazAqparat tilshisi aýmaqtyq TJD baspasóz qyzmetine silteme jasap.
Vedomstvonyń málimetinshe, qaıǵyly jaǵdaı Shortandy kentinde bolǵan. Káriz qudyǵynda jóndeý jumystary kezinde «Shortandy sý» kommýnaldyq kásipornynyń úsh qyzmetkeri metanoldan ýlanyp qaldy.
Zardap shekken «Shortandy sý» kommýnaldyq kásipornynyń júrgizýshisi Andreı Tkachevtyń sózinshe, olar ortalyq káriz júıesin tazalaý boıynsha josparly jumystar júrgizip jatqan.
«Ýlanǵan úsh jumysshynyń ishinde 2001 jyly týǵan slesardy qutqarý múmkin bolmady, ol sol jerde kóz jumdy. Al, qalǵan ekeýin kýágerler qutqaryp, jedel járdem qyzmetine tapsyrdy», - deıdi vedomstvodan.
