Aqmolada eki basshy mal derekterin jalǵan engizip, 50 mln teńgeden astam sýbsıdııa alǵan
ASTANA. KAZINFORM — Qarjylyq monıtorıng agenttiginiń Aqmola oblysy boıynsha departamenti prokýratýranyń úılestirýimen mal sharýashylyǵyn damytýǵa bólingen bıýdjet qarajatyn jymqyrý deregi boıynsha tergeý júrgizip jatyr.
Tergeý derekterine qaraǵanda, «Medına» aýyl sharýashylyǵy óndiristik kooperatıviniń dırektory men Shortandy aýdandyq veterınarııalyq stantsııasynyń basshysy aqparattyq júıege iri qara mal sany týraly jalǵan málimet engizip, memlekettik sýbsıdııany zańsyz alýdy uıymdastyrǵan.
— Atap aıtqanda, 57 asyl tuqymdy tuqymdyq buqa bar degen jalǵan málimettiń negizinde bıýdjetten 9 mln teńge aýdarylǵan. Keıin osy derekterge súıenip, is júzinde júrgizilmegen selektsııalyq jumystarǵa taǵy 17 mln teńge bólingen. Budan bólek, tórt ótinimde analyq mal sany 3 myń basqa artyq kórsetilgen. Sonyń saldarynan taǵy 27 mln teńge sýbsıdııa negizsiz alynǵan, — delingen vedomstvonyń baspasóz qyzmeti taratqan habarlamada.
Memleketke keltirilgen zalal 50 mln teńgeden asty. Kooperatıv dırektoryna qatysty úıqamaq túrindegi bultartpaý sharasy qoldanyldy.
Tergeý jalǵasyp jatyr. QR QPK-niń 201-babyna sáıkes ózge aqparat jarııa etilmeıdi.
Eske salaıyq, buǵan deıin Qarjylyq monıtorıng agenttigi Soltústik Qazaqstan oblysy boıynsha departamenti Aıyrtaý aýdanyndaǵy qurylys kezinde bıýdjet qarajatyn jymqyrý deregi boıynsha tergep-tekserý júrgizip jatqanyn habarlaǵan edik.
