Aqmolada 3,7 mln astam memlekettik qyzmet elektrondyq formatta kórsetildi

KÓKShETAÝ. QazAqparat - Jyl basynan beri Aqmola oblysynda 3,7 mıllıonnan astam memlekettik qyzmet elektrondyq formatta kórsetildi. Bul týraly óńirlik kommýnıkatsııalar brıfıngte QR Memlekettik qyzmet isteri agenttigi Aqmola oblysy boıynsha departamenti memlekettik kórsetiletin qyzmet basqarmasynyń basshysy Ádilbek Muhamedjanov aıtty, dep habarlaıdy QazAqparat tilshisi vedomstvonyń baspasóz qyzmetine silteme jasap.

Basqarma basshysynyń aıtýynsha, memlekettik organdardyń qyzmetin taldaý oblysta 2019 jyldyń 9 aıy ishinde 4 565 338 qyzmet kórsetilgenin kórsetti. Onyń ishinde elektrondyq formatta– 3 791 299 nemese 83,1 paıyz, qaǵaz túrinde – 393 169 nemese 8,6 paıyz, memlekettik korporatsııa arqyly – 380 870 nemese 8,3 paıyz.

Elektrondyq formatta memlekettik qyzmetterdi alý boıynsha kórsetkishter jaqsarǵan. Elektrondyq úkimet portalyn belsendi paıdalanatyn tulǵalar úlesiniń artýyn berilgen elektrondyq-tsıfrlyq qoltańbalardyń artýy rastaıdy. 9 aı ishinde oblys turǵyndaryna 266 155 (2018 -244 561) ETsQ berildi.

«Halyqqa arnalǵan qyzmet» qaǵıdatyn jandandyrý maqsatynda «Memlekettik qyzmetter jármeńkesi» aktsııasyn ótkizý dástúrge aınaldy (barlyǵy 58), onyń barysynda shalǵaı eldi mekenderdiń turǵyndary qajetti salalarda memlekettik qyzmetterdi alý týraly keńes alady, qyzmetterdi alýǵa ótinim beredi, sondaı-aq elektrondyq úkimet portalynda jumys isteý daǵdylaryna oqytýdan ótedi.

Oblystyń barlyq aýyldyq okrýgterinde aýyldyq okrýg turǵyndaryn «EE.GOV» elektrondyq úkimet portalynda jumys isteý daǵdylaryna oqytýǵa baǵyttalǵan is-sharalar ótkizildi.

«Departament óziniń baqylaý fýnktsııalaryn júzege asyra otyryp, 2019 jyldyń 9 aıy ishinde - 59, ótinishter boıynsha jospardan tys – 36, memlekettik organdardyń tapsyrmasy boıynsha - 8 tekseris ótkizip, sondaı-aq sýbektilerge baryp 15 profılaktıkalyq baqylaý júrgizdi. Tekserý qorytyndysy boıynsha memlekettik qyzmet salasyndaǵy zańnamany buzýdyń 55 faktisi anyqtalyp, jalpy somasy 185 375 teńgege 6 ákimshilik is quryldy, tártiptik jaýapkershilikke 33 laýazymdy tulǵa tartylyp, onyń ishinde 16 sógis, 16 eskertý jáne 1 qyzmetke tolyq sáıkes emestigi týraly eskertý jasaldy», – deıdi QR Memlekettik qyzmet isteri agenttigi Aqmola oblysy boıynsha departamenti memlekettik kórsetiletin qyzmet basqarmasynyń basshysy Ádilbek Muhamedjanov.

Sonymen qatar, basqarma basshysy atap ótkendeı, vedomstvo mamandary 9 aıda memlekettik qyzmet kórsetý sapasyna qatysty azamattardyń 30 ótinishin qaraǵanyn atap ótti.

«Tekserý qorytyndysy boıynsha 7 azamattyń quqyqtary qalpyna keltirildi. Taldaý nátıjeleri kórsetkendeı, shaǵymdardyń basym bóligi jer qatynastary, TKSh jáne sáýlet salalaryna qatysty», – dep tolyqtyrdy basqarma basshysy.