Aqmolada 23 ınvestjoba sybaılas jemqorlyqqa qarsy sharalarmen qamtylǵan
Osymen Aqmola oblysynda sybaılas jemqorlyqqa qarsy súıemeldeýmen 23 ınvestjoba qamtyldy, dep habarlaıdy QazAqparat tilshisi QR Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń baspasóz qyzmetine silteme jasap.
Vedomstvonyń málimetinshe, «Protecting Business and Investments» jobasy sheńberinde azyq-túlik, ónerkásip buıymdaryn, júk tehnıkasy óndiretin nemese jolaýshylar tasymalymen, sondaı-aq oblys aýmaǵynda qurylys salýmen aınalysatyn nemese jel generatorlaryn ornatý boıynsha qyzmet kórsetetin iri kompanııalar men kásiporyndardyń basshylarymen iskerlik kezdesý ótkizdi.
«Eger sizder zańsyz sybaılas jemqorlyq áreketterine, bıýrokratııalyq tosqaýyldar jasaýǵa jáne qyzmet kórsetýdiń zańdy merzimin sozý jaǵdaılaryna tap bolsańyz, onda bizdiń departamentke dereý júginýge quqylysyzdar. Sodan keıin biz kináli tulǵalarǵa qatysty naqty sharalar qabyldaıtyn bolamyz. Sonymen qatar, biz sizderdi bıznesti adal júrgizýge shaqyramyz» - dedi departament basshysy Murat Tóleýbaev.
PBI aıasynda Kókshetaý qalasynyń ákimi Amangeldi Smaıylov óz kómegin kórsetýge ýáde berip, qalada túrli kásiporyndardyń qyzmetin kedergisiz júzege asyrý úshin barlyq jaǵdaı jasalǵanyn atap ótti.
«Túıitkildi máselelerdi jáne ózara tıimdi yntymaqtastyq boıynsha aldaǵy josparlardy talqylaǵannan keıin kezdesýge qatysýshylar bıznesti sybaılas jemqorlyqqa qarsy qoldaý týraly 12 memorandýmǵa qol qoıyldy. Endi Aqmola oblysynda sybaılas jemqorlyqqa qarsy súıemeldeýmen 23 ınvestjoba qamtylǵan. Barlyq kásipkerlerge turaqty negizde túrli máselelerdi sheshýde tıisti kómek kórsetiledi», dep atap ótti vedomstvodan.
