Aqmolada 200-den astam sheteldik Qazaqstan azamattyǵynan aıyryldy

AQMOLA. QazAqparat - Aqmola oblysynda 200-den astam sheteldik azamat Qazaqstan Respýblıkasynyń azamattyǵynan aıyryldy, dep habarlaıdy QazAqparat tilshisi Polisia.kz saıtyna silteme jasap.

Jyl basynan beri aımaqtaǵy ІІD Kóshi-qon qyzmeti basqarmasy mamandary 220 sheteldiktiń el azamattyǵynan aıyrylǵanyn tirkedi. Mysaly, sáýir aıynda oblys aýmaǵynda qos azamattyǵy bar azamatsha anyqtalǵan. 54 jastaǵy quqyq buzýshy ákimshilik jaýapkershilikke tartylyp, sot sheshimimen Qazaqstan aýmaǵynan shyǵaryldy.

«Qazaqstan Konstıtýtsııasynyń 10-babynyń 3-tarmaǵyna jáne «Azamattyq týraly» QR Zańynyń 3-babyna sáıkes respýblıka azamaty basqa memlekettiń azamaty bolyp tanylmaıdy, ıaǵnı shetel azamaty bir mezgilde Qazaqstan azamaty bola almaıdy. Eger qazaqstandyq basqa memlekettiń azamattyǵyn alatyn bolsa, onda sol sátten bastap Qazaqstan azamattyǵy saqtalmaıdy. Bul zańnamany buzý 200 aılyq eseptik kórsetkish mólsherinde aıyppul túrindegi ákimshilik jaýaptylyqqa ne Qazaqstannyń sheginen ákimshilik jolmen shyǵaryp jiberýge ákep soǵady «, - dep túsindirilgen jazbada.