Aqmolada 2 áıel kúıeýleriniń aqshasyn urlaǵan
KÓKShETAÝ. QazAqparat – Aqmola oblysy polıtsııasy kúıeýleriniń aqshasyn urlaǵan áıelderdi ustady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, bir-birine uqsas eki qylmys oblystyń ár óńirinde tirkelgen.
«Shildeniń 29-da Tselınograd aýdany Novoıshımka aýylynyń 40 jastaǵy turǵyny polıtsııaǵa habarlasyp, belgisiz adam úıine kirip, seıftegi 250 myń teńgesin alyp ketkenin aıtty. Jedel izdestirý sharasy kezinde ury - 29 jastaǵy kelinshek, zardap shegýshiniń azamattyq nekede bolǵan burynǵy áıeli ekeni anyqtaldy», - dep aıtty vedomstvodan.
Buǵan deıin 7 shildede Tselınograd aýdany Talapker aýylynyń 38 jastaǵy turǵyn aryzdanyp, plastıkalyq terezeni buzyp kirgen beımálim bireý 300 myń teńge aqshasyn úptep ketkenin aıtqan bolatyn.
«Bul joly zardap shegýshige hat kelgen. Onda ury keshirip surap, urlanǵan aqshany eki aptanyń ishinde qaıtaratynyn aıtyp, ýáde etken. Hattyń ishine 10 myń teńge aqsha salyp jibergen. Polıtsııaǵa qoljazbany jazǵan adamdy tabý qıynǵa soqpady. Jedel izdestirý sharasy kezinde osy is boıynsha kúdikti Talapker aýylynyń 26 jastaǵy turǵyny, zardap shegýshiniń áıeli ekeni anyqtaldy», - dep tolyqtyrdy vedomstvonyń baspasóz hatshysy.
Birinshi oqıǵada erli-zaıyptylar azamattyq nekede turǵandyqtan, zardap shegýshi isti toqtatý týraly aryz berse, ekinshi jaǵdaıda ekeýi zańdy nekede turǵandyqtan is toqtatyldy.
