Aqmolada 150-den astam sadaqshynyń qatysýymen QR Chempıonaty ótýde
KÓKShETAÝ. QazAqparat - Aqmola oblysynda sadaq atýdan jasóspirimder men kadetter arasynda QR Chempıonaty ótip jatyr, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
«Sońǵy jyldary Aqmola oblysynda sadaq atý sııaqty dástúrli sport túrleri keńinen qanat jaıýda. 2017 jyly «Aqmola oblysynyń «Altyn jebe» sadaq atý federatsııasy» qoǵamdyq birlestigi quryldy. Sol sebepti Tselınograd aýdanynyń ortalyǵy Aqmol aýylynda sadaq atýdan jasóspirimder men kadetter arasynda QR Chempıonatyn ótkizý qolǵa alynyp otyr», - deıdi óńirlik kommýnıkatsııalar qyzmeti.
Uıymdastyrýshylar atalmysh sport túrin jastar arasynda nasıhattaı otyryp, halyqaralyq jarystarǵa myqty sportshylardy iriktep almaqshy.
Jarys Astananyń 20 jyldyǵy, Tselınograd aýdanynyń 90 jyldyǵy jáne elimizdegi sadaq atý sportynyń 50 jyldyǵyna arnalyp otyr. Jarysqa Astana men Almaty qalalary, Aqmola, Pavlodar, Shyǵys Qazaqstan, Túrkistan, Qaraǵandy jáne Almaty oblystarynan 150-den astam sadaqshy qatysýda.
«Chempıonattyń ashylýy saltanatyna Tselınograd aýdanynyń ákimi Malǵajdar Tátkeev, QR UOK sport dırektsııasynyń dırektory Elsııar Qanaǵatov qatysyp, quttyqtaý sóz sóıledi. Sondaı-aq, qurmetti qonaqtardyń arasynda Aqmola oblysynyń dene shynyqtyrý jáne sport basqarmasynyń basshysy Áset Búkibaev, UOK sport dırektsııasy dırektorynyń orynbasary Bolat Havlahat, sadaq atý týrnıriniń bas tóreshisi Olga Lı, QR sport sheberi jáne ulttyq quramanyń memlekettik jattyqtyrýshysy Edil Temirbekov, Aqmola oblysynyń «Altyn jebe» sadaq atý federatsııasynyń vıtse-prezıdenti, «Rodına» agrofırmasy» JShS bas dırektory Ivan Saýer bar. Chempıonat tamyzdyń 9-10 aralyǵyna deıin jalǵasatyn bolady» dep kórsetilgen habarlamada.
