Aqmolada 15 keli esirtki saýdalamaq bolǵandar ustaldy

KÓKShETAÝ. QazAqparat – Aqmola oblysynda 15 kelige jýyq esirtki saýdalamaq bolǵandar ustaldy, dep habarlaıdy QazAqparat oblystyq PD baspasóz qyzmetine silteme jasap.

Vedomstvonyń málimetinshe, «Kóknár-2019» jedel aldyn alý sharasy kezinde oblys aýmaǵyna Jambyl oblysynan esirtki (gashısh) jetkizý joly kesildi. Esirtki saýdasymen aınalysqan topty anyqtap, ustaý maqsatynda Aqmola oblysynyń narkopolıtseıleri eki apta boıy keshendi shara júrgizgen.

«Bıylǵy jylǵy tamyzdyń 30-da Ereımentaý aýdanynyń aýmaǵynda júrgizilgen arnaıy aldyn alý sharasy kezinde Nur-Sultan qalasynyń turǵyny ustalyp, odan 1,8 gramm gashısh salynǵan qaǵaz býma alyndy. Al, onyń kóligin tekserý kezinde ıisshil ıttiń kómegimen tórt býmaǵa bólinip salynǵan, jalpy salmaǵy 3 keli 988 gramm gashısh tabyldy», - deıdi vedomstvonyń baspasóz qyzmetindegiler.

Budan bólek, aýdan aýmaǵynda esirtki saýdasymen aınalysqan jergilikti eki turǵyn ustaldy.

«Onyń biriniń jumys ornyn tintý barysynda birneshe bólip qaǵaz býmaǵa salynǵan 900 gramm esirtki tabylsa, ekinshi kúdiktiniń úıinen esirtki zatyn paıdalanatyn jasandy aspap alyndy.

Sol kúni astana irgesindegi aýdan aýmaǵynda Jambyl oblysynyń turǵyny ustaldy. Onyń jeke zattaryn tintý kezinde sporttyq sómkesinen 10 keli qara sora tabyldy. Kúdiktilerdiń barlyǵy ustalyp, ýaqytsha ustaý oqshaýlaǵyshyna qamaldy», dep tolyqtyrdy vedomstvodan.