Aqmolada 14 mıllıon teńgeniń múlkin tonaǵan kúdikti ustaldy
KÓKShETAÝ. QazAqparat - Aqmola oblysynda 14 mıllıon teńgeniń áshekeı buıymdary men qundyz tondaryn urlaǵan kúdikti ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimeti boıynsha, qylmys «Páter» jedel aldyn alý sharasy kezinde anyqtaldy.
«Zardap shegýshiniń aryzy boıynsha, aqpannyń 4-de belgisiz bireýler onyń páterine túsip, qymbat áshekeı buıymdary men 3 qundyz tonyn qoldy qylǵan. Shyǵyn kólemi 14,2 mıllıon teńgeni qurady. Kúdiktilerdi ustaý boıynsha tájirıbeli tergeýshilerden quralǵan arnaıy top quryldy. Oqıǵa ornyn teksergen polıtseıler urylardyń páter esiginiń qulpyn soǵan keletin kiltpen ashqany anyqtaldy.
Qolǵa alynǵan sharalardyń nátıjesinde naýryzdyń 18-de krımınaldy polıtsııa qyzmetkerleri Astana qalasynyń 1986 jylǵy turǵynyn ustap, odan esik qulpyn ashatyn quraldar jıyntyǵyn tárkiledi.
Qazirgi kezde kúdikti ýaqytsha ustaý oqshaýlaǵyshyna qamaldy jáne ústinen QR QK 188 babynyń 4 bólimi boıynsha iz qozǵalyp, sotqa deıingi tergeý amaldary júrgizilýde», deıdi PD baspasóz qyzmetindegiler.
Sonymen qatar, «Páter» jedel aldyn alý sharasy kezinde Şýche qalasy turǵynynyń páterinen 1 200 000 teńgeniń múlkin tonaý qylmysy anyqtaldy. Qylmys 11 naýryzda jasalǵan jáne osyǵan kúdikti Birjan sal aýdanynyń turǵyny ustaldy. Atalmysh qylmysqa qatysty QR QK 188 babynyń 2 bóligi boıynsha tergeý amaldary júrgizilýde. Polıtseıler kúdiktiniń budan ózge qylmystarǵa qatysy bar-joǵyn anyqtaýda.
