Aqmolada 13 jasar qyzdyń joǵalýyna baılanysty qylmystyq is qozǵaldy
KÓKShETAÝ. QazAqparat – Aqmola oblysynda 13 jasar qyzdyń iz-túzsiz joǵalýyna baılanysty «Adam óltirý» baby boıynsha sotqa deıingi tergeý amaldary júrgizilýde, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, iz-túzsiz ketken jasóspirim Áıgerim Haıdarovany izdestirý jumystary segiz kúnnen beri júrip jatyr.
«Osyǵan baılanysty Qylmystyq kodekstiń 99-baby «Adam óltirý» boıynsha is qozǵalyp, sotqa deıingi tergeý amaldary bastaldy. Jasóspirimdi joǵalǵan kúni kórýi múmkin 200-den astam kýágerden jaýap alyndy», - deıdi vedomstvodan.
Eske sala keteıik, 21 tamyzda Kókshetaý qalalyq PB kezekshilik bólimine joǵalǵan qyzdyń anasy júgingen. Anasynyń aıtýynsha, Áıgerim 20 tamyz saǵat 15:00 shamasynda Nurly kósh aýylynda turatyn úıden shyǵyp, shashtarazǵa ketken.
Sodan qaıtyp oralmaǵan, uıaly telefony óshirýli, qaıda ekeni belgisiz.
Polıtsııa qyzmetkerleri atap ótkendeı, izdestirý jumystaryna 100-den astam polıtsııa, 20-dan astam qutqarýshy jáne 30-dan astam Ulttyq gvardııa 5510 áskerı bóliminiń sarbazy, 350 volonter jumyldyrylǵan.
«Atalǵan is Aqmola oblystyq PD bastyǵynyń jeke baqylaýynda», - dep tolyqtyrdy vedomstvodan.
