Aqmolada 121 myń gektar jer memleket menshigine qaıtaryldy
ASTANA. KAZINFORM — Birjan sal aýdanynda prokýratýranyń qadaǵalaý sharalary nátıjesinde 121 myń gektardan astam paıdalanylmaǵan jaıylym memleket menshigine qaıtaryldy. Jerdiń kadastrlyq quny 492,6 mln teńgeni quraıdy. Bul týraly Aqmola oblysy prokýratýrasy málim etti.
Birjan sal aýdanynyń prokýratýrasy «Paıdalanylmaǵan jerlerdi qaıtarý» jobasyn iske asyrýdy jalǵastyryp otyr.
Prokýratýranyń málimetinshe, ótken aıda prokýrorlyq qadaǵalaý sharalary nátıjesinde kadastrlyq quny 492,6 mln teńgeni quraıtyn 121 myń gektardan astam jaıylymdyq jertelimderi memleket menshigine qaıtarylǵan.
Jer ýchaskeleri olardy paıdalaný jónindegi mindettemelerin tıisinshe oryndamaǵan «Sulu Daria» JShS-nen sot sheshimi negizinde memleketke qaıtaryldy.
Osylaısha, aýdanda paıdalanylmaı jatqan jerlerdi memleket menshigine qaıtarý jumystary jalǵasyn tabýda. Buǵan deıin prokýratýranyń jobasy aıasynda 26 myń gektardan astam jer memleket menshigine qaıtarylǵan bolatyn.
Qaıtarylǵan jerlerdi tıimdi paıdalaný maqsatynda qadaǵalaý organy jergilikti atqarýshy organdarǵa atalǵan jerlerdi aýyl sharýashylyǵy qyzmetin júrgizý jáne áleýmettik-ekonomıkalyq jobalardy iske asyrý úshin adal nıetti jergilikti turǵyndar men ınvestorlarǵa berý jóninde baǵyt-baǵdar berdi.
Prokýratýranyń osy baǵyttaǵy jumysy jalǵasady.
Buǵan deıin Qostanaı oblysynda quny 112 mln teńgeden asatyn jer memleketke qaıtarylǵanyn jazdyq.
