Aqmolada 1 mlrd teńge jymqyrǵan oblystyq densaýlyq saqtaý eks-basshysy sottaldy

KÓKShETAÝ. QazAqparat - Aqmola oblystyq densaýlyq saqtaý basqarmasynyń eks-basshysy men kásipker 9 jylǵa sottaldy. Birinshisi alaıaqtyqqa sybaılas bolǵany úshin aıypty dep tanylsa, ekinshisi iri kólemde alaıaqtyq jasaǵany úshin bas bostandyǵynan aıyryldy, dep habarlaıdy QazAqparattyń menshikti tilshisi.

Oblystyq sottyń baspasóz qyzmetiniń aqparaty boıynsha, «Avıtsenna-Býrabaı» JShS basshysynyń mindetin atqarýshy K. men densaýlyq saqtaý basqarmasynyń eks-basshysy I. 2017 jyly Býrabaı aýdandyq densaýlyq saqtaý nysandaryn senimdi basqarmaǵa berý týraly kelisim ornatty.

Munyń bári G-men qylmystyq kelisim aıasynda júzege asty.

«Osy kelisim aıasynda JShS normalar men tehnıkalyq sıpattamalarǵa, sapa kórsetkishterine, sonymen qatar dárilik zattar, medıtsına buıymdary men farmatsevtıka qyzmetterin uıymdastyrý erejeleri men «Halyq densaýlyǵy jáne densaýlyq saqtaý júıesi» kodeksine saı keletin jańa, buryn paıdalanylmaǵan medıtsınalyq quraldar satyp alýǵa mindettelgen. Biraq sottalǵan azamattar sapasyz medıtsınalyq tehnıkany ornatyp, 1 mlrd teńgeden astam qarjyny jymqyrǵan. Sonyń saldarynan memleketke asa iri kólemde shyǵyn keldi», - dedi vedomstvo ókilderi.

Sot K. áreketin QR QK 190-bap, 4-bóligi, 2-tarmaǵy boıynsha asa iri kólemdegi alaıaqtyq dep baǵalasa, I. QR QK 190-bap, 4-bóligi, 2-tarmaǵy, 28-baptyń 5-bóligi alaıaqtyqqa sybaılas bolǵany úshin aıypty dep tanyldy.

Ekeýiniń de kinási kýágerlerdiń, zardap shekken tarap pen sot saraptamasynyń nátıjesinde dáleldendi.

«Jazany taǵaıyndaý kezinde sot jeńildetetin jaǵdaılardy eskerdi: K. men I., ant qabyldaǵan laýazym ıeleri bola tura qyzmetin paıdalanyp qylmys jasady, materıaldyq shyǵyn qaıtarylǵan joq. Sot sheshimimen K. men I. 9 jylǵa bas bostandyǵynan aıyrylyp, ómir boıy memlekettik qyzmet atqara almaıdy. Sonymen qatar K-niń múlki, avtokóligi tárkilendi», - dep tolyqtyrdy vedomstvo.

Úkim zańdy kúshine engen joq.

2022 jyly osy is qatysýshylarynyń biri – Aqmola oblystyq densaýlyq saqtaý basqarmasynyń eks-basshysyna basqa is boıynsha úkim shyqqan bolatyn.

Oǵan JShS dırektorymen birge elde tótenshe jaǵdaı jarııalanǵan kezde bıýdjet qarjysyn jymqyrǵany úshin segiz jylǵa bas bostandyǵynan aıyrylyp, 86,8 mln teńge kóleminde materıaldyq shyǵyndy óteý talap etildi.

Sotta birinshi úkimniń kúshin ekinshi úkim merzimi joıatyny aıtyldy.