Aqmola jurtshylyǵy latyn álipbıine kóshýdi qoldaıtyndyqtaryn bildirdi
«Kókshetaý» mádenıet saraıynda ótken sharaǵa ǵylymı jáne shyǵarmashylyq ıntellegentsııa, etnomádenı jáne qoǵamdyq birlestik ókilderi, depýtattar korpýsy jáne jastardan quralǵan 400-den astam adam qatysty.
Sharada aımaq basshysy Málik Myrzalın sóz sóılep, Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasynda latyn álipbıine kóshý týraly mańyzdy tapsyrma bergenin atap ótti.
«Osy júktelip otyrǵan jaýapkershilikti sezine otyryp, barshamyzǵa ortaq is, ıaǵnı, latyn grafıkasyna kóshýdi júzege asyrý jolynda Sizderdiń pikirlerińiz ben usynystaryńyzdy bilý úshin jınalyp otyrmyz», dedi Málik Myrzalın.
Forýmda L.Gýmılev atyndaǵy Eýrazııa ulttyq ýnıversıtetiniń tarıh ǵylymdarynyń doktory Maral Habdýlına, Sh.Ýálıhanov atyndaǵy Kókshetaý memlekettik ýnıversıtetiniń fılılologııa ǵylymdarynyń doktory Belgibaı Shalabaev, Olga Anışenko, pedagogıka ǵylymdarynyń kandıdaty Nellı Jumaǵulova, Qazaqstan halqy Aqmola assambleıasynyń múshesi Natalıa Dementeva baıandama jasady.
Fılologııa ǵylymdarynyń kandıdaty, J.Mýsın atyndaǵy joǵary qazaq pedagogıkalyq kolledjiniń dırektory Nurtas Ahat latyn jazýyna kóshý bul ýaqyt talaby ekenin atap ótti.
«Latyn álipbıine kóshý ýaqyt talaby jáne ǵylym men tehnıkanyń qazirgi zamanǵy jetistikterine qol jetkizýge múmkindik beredi...», dedi Nurtas Ahat.
Al, jazýshy-aýdarmashy Ǵosman Tóleǵul atalmysh reforma bizdiń halqymyz úshin tarıhı mańyzy zor qadam bolyp otyrǵandyǵy týraly tuşymdy oıymen bólisti.
«Qoǵamdyq sanany jańǵyrtýda ulttyń rýhanı jaǵynan damýy úshin osyndaı qadamǵa barý aýadaı qajet. Qazaqstannyń shırek ǵasyrda jetken jetistikterin eskersek, bizder bul asýdy da qınalmaı alatynymyz kúmánsiz», -dedi Ǵosman Tóleǵul.
Jalpy, formýǵa qatysýshylar óz oı-pikirlerin aıta kele, biraýyzdan latyn álipbıine kóshýdi qoldaıtyndyqtaryn jetkizdi.
«Latyn álipbıine aýysý bul Qazaqstannyń dúnıejúzi qaýymdastyǵyna jaqyndaı túsetinin bildiredi. Dúnıejúzi elderiniń kóbi osy latyn jazýyn qoldanady. Keleshek urpaq latyn jazýymen qazaq tilin oqı otyra, aǵylshyn tilin de tez meńgerip ketedi. Sheteldikterge de qazaq tili men álipbıin meńgerýge jeńil bolatyny sózsiz. Bul Qazaqstannyń ǵalamdyq aqparat keńistigindegi úderisi, bizdiń barlyq sandyq resýrstar men mádenı muramyz latyn álipbıin qoldanatyn elder men halyqtarǵa qoljetimdi bolar edi»,- dep kórsetilgen Aqmola jurtshylyǵynyń úndeýinde.
