«Aqmola juldyzdary» baıqaýynyń júldegerleri avtokólik mindi
KÓKShETAÝ. QazAqparat - Kókshetaýda Jastar jyly jáne Mádenıet jáne óner salasy qyzmetkerleriniń kúnine oraı «Aqmola juldyzdary» oblystyq halyq shyǵarmashylyǵy baıqaýynyń gala-kontserti ótti, dep habarlaıdy QazAqparat tilshisi.
Sharaǵa aımaq basshysy basshysy Ermek Marjyqpaev qatysyp, úzdik óneri men shyǵarmashylyq jetistikke qol jetkizgen sala qyzmetkerlerin quttyqtady.
«Bizdiń óńir árqashanda óziniń baı mádenı murasymen jáne daryndarymen dańqty. Mádenıt salasynyń qyzmetkerleri men ardagerleri elimizdiń gúldenýi men damýyna, adamgershilik pen izgilik qundylyqtardy saqtaýǵa ólsheýsiz úles qosýda», - dedi Ermek Marjyqpaev sózinde.
Oblysta «Aqmola juldyzdary» baıqaýyn ótkizý dástúrge aınalǵan. Onda ónerpaz, ánshiler men bıshilerdiń qatary jyl saıyn jańa daryndardyń esimimen tolyǵa túsip, oblystyń shyǵarmashylyq ómiriniń damýyna úles qosýda. Bıylǵy óner dodasyna oblystyń 211 aýyldyq okrýginen 50 myńnan astam adam qatysyp otyr. 110 jańa shyǵarmashylyq ujym men 151 jańa ánshi anyqtaldy.
Sharada 60-tan astam mádenıet salasy men shyǵarmashylyq ıntellegentsııa ókilderi «Eńbek ardageri» medali, «Úzdik ólketanýshy» men «Mádenıet salasynyń úzdigi» tós belgileri jáne Qurmet gramotalarymen marapattaldy. Olardyń arasynda Aqmola oblystyq orys drama teatrynyń ártisi Vıktor Krylov, aqyn sazger Iran Tasqara, Astarahan aýdandyq mádenıet úıiniń jetekshisi Svetlana Pesotskaıa, Úkili Ybyraı atyndaǵy Aqmola oblystyq fılarmonııasynyń «Gákký» bı ansambliniń baletmeısteri Gúlmıra Ordabaeva bar.
«Aqmola juldyzdary» oblystyq baıqaýynyń qorytyndysy boıynsha úzdik shyǵarmashylyq jetistikteri úshin Stepnogorsk, Býrabaı jáne Arshaly aýdandary birinshi orynǵa ıe boldy. Olarǵa oblys ákimi dybys jazý apparatýrasyn syılady. Al, gran-prı júldesine Kókshetaý, Esil jáne Tselınograd aýdandarynyń shyǵarmashylyq ujymdary laıyq tanylyp, avtokólikke ıe boldy.
Aıta keteıik, oblysta 257 klýb, 370 kitaphana, 11 murajaı, 2 teatr, Úkili Ybyraı atyndaǵy Aqmola oblastyq fılarmonııasy, oblystyq mádenıet jáne halyq shyǵarmashylyǵy ortalyǵy, tarıhı-mádenı murany qorǵaý jáne paıdalaný ortalyǵy jumys isteıdi. Sońǵy 3 jyl ishinde mádenıet salasynda 46 nysan jóndeldi. Bıylǵy jyly 7 nysanǵa jóndeý jumystary josparlanǵan. Qazirgi kezde, oblystyq eki murajaı qalpyna keltirilýde. Sondaı-aq, «Uly Dalanyń jeti qyry» baǵdarlamasy sheńberinde Birjan sal, Aqan seri, Balýan Sholaq, Úkili Ybyraı jáne Kenesary sııaqty uly tulǵalarǵa eskertkish ornatý jobasy júzege asyrylýda.
