Aqmola jáne Soltústik Qazaqstan oblystarynda egin jınaý naýqany áli aıaqtalǵan joq - AShM

ASTANA. 12 qarasha. QazAqparat - Bıylǵy jaýyn-shashyn mólsheri kóp jylǵy kórsetkishten 30 paıyzǵa jýyq artyq bolǵandyqtan, Aqmola jáne Soltústik Qazaqstan oblystarynda egin jınaý naýqany áli aıaqtalǵan joq. Bul týraly búgin Úkimet otyrysynda QR Aýyl sharýashylyǵy mınıstri Asyljan Mamytbekov málimdedi.

Onyń aıtýynsha, bıylǵy egin jınaý naýqany aýa raıynyń qıyn jaǵdaılarynda ótti.

«Shildeniń ekinshi jartysynan bastap jaýǵan mol jaýyn-shashyn dándi daqyldardyń pisip-jetilýiniń sozylýyna, egistikke beldeýliktiń jáne qosymsha óskinderdiń paıda bolýyna, aramshptiń kóbeıýine ákelip soqtyrdy. Egin jınaý kezeńindegi kópjylǵy orta kórsetkishten 30% artatyn jıi jaýyn-shashynǵa baılanysty qazirgi ýaqytqa deıin Aqmola jáne Soltústik Qazaqstan oblystarynda egin jınaý jumystary aıaqtalǵan joq, astyq tazalaý men keptirý jumystary ulǵaıdy», - dedi A. Mamytbekov.

Mınıstrdiń málimetinshe, búgingi tańda respýblıka boıynsha dándi daqyldar jınalatyn alqabynyń 15,6 mln. gektary nemese 99,3% bastyrylyp, gektaryna 13,3 tsentner ónimdilikpen bastapqy salmaqpen 20,8 mln. tonna astyq jınaldy. 114,6 myń ga dándi daqyldar alqabyn jınaý qaldy.

Sondaı-aq, A. Mamytbekovtiń aıtýynsha, maıly daqyldar alqabynyń 73%, qant qyzylshasynyń 83%, kókónis-baqsha daqyldary men kartoptyń 97% jınaldy.