Aqmola jáne Pavlodar oblystarynyń avtojoldary jabyldy
ASTANA. QazAqparat - Burqasynǵa baılanysty Aqmola jáne Pavlodar oblystarynyń avtojoldary jabyldy, dep habarlady QR ІІM Tótenshe jaǵdaılar komıteti.
Mekemeniń habarlaýynsha, 19 jeltoqsan kúni 11:20-da aýa raıy jaǵdaıynyń kúrt nasharlaýyna baılanysty (burqasyn) barlyq kólik túrlerine «Astana-Şýche» avtojolynyń bóligi jabyldy. Dál osy sebeptten, 13:20-dan beri «Astana-Pavlodar» avtojolynyń bóligi barlyq kólikter úshin jabyq. Aqmola oblysynda 11:00-den bastap, «Astana-Petropavl» (Astana-Şýche, 18-231 shaqyrym) avtojolynyń bóligi jabyldy.
13:30-dan bastap, aýa raıynyń qolaısyzdyǵyna baılanysty (kúshti jel, qar, burqasyn, kórinistiń nasharlaýy) barlyq kólik túrleri úshin «Jezqazǵan-Petropavl» (Qostanaı oblysy men SQO shekarasy, 377-595 shaqyrym), «Astana-Ereımentaý-Shiderti» (Astana men Pavlodar oblysynyń shekarasy, 16-205 shaqyrym) avtojoldary jabyldy.
Pavlodar oblysynda 13:45-ten beri «Astana-Ereımentaý-Shiderti» (Shiderti aýylynan Aqmola oblysynyń shekarasyna deıin 205-259 shaqyrym) avtojol bóligindegi jol qozǵalysy toqtap tur.
