Aqmola jáne Qostanaı oblystaryndaǵy 4 jol bóligine engizilgen shekteý alyndy
ASTANA. QazAqparat - 24 qarashadan 25 qarashaǵa qaraǵan túni jolshylar respýblıkalyq mańyzdaǵy joldarda kóktaıǵaqty boldyrmaý úshin óńdep, qysqy kútip-ustaý aıasynda jumys atqardy, dep habarlaıdy QazAqparat Respýblıkalyq mańyzy bar avtomobıl joldarynyń ulttyq operatoryna silteme jasap.
Bul jumystarǵa túnde 300-ge jýyq arnaıy tehnıka men 400-ge jýyq jol mamandary jumyldyryldy. Tasjoldarǵa 700 m3 kóktaıǵaqqa qarsy materıal sebildi.
Esterińizge sala keteıik, túnde aýa-raıynyń qolaısyzdyǵyna oraı avtokólik quraldarynyń barlyq túri úshin Aqmola jáne Qostanaı oblystaryndaǵy respýblıkalyq avtojoldardyń tórt ýchaskesinde qozǵalysqa shekteý engizildi. Jolshylar atqarǵan jumystan keıin tasjoldardyń ýchaskeleri ashyldy.
Qazirgi ýaqytta Jetisý óńirinde aýa-raıynyń qolaısyzdyǵyna oraı «Úsharal-Dostyq» trassasynyń Kóktum stantsııasynan Dostyq stantsııasyna deıingi aralyǵy jabyq (84-184 shq aralyǵy).
Qysqy kútip-ustaý jumystary jalǵasyp jatyr.
Shtattan tys jaǵdaı týyndasa respýblıkalyq avtojoldardy paıdalanýshylar 1403 qysqa nómiri boıynsha «QazAvtoJol «UK» AQ biryńǵaı táýlik boıǵy koll-ortalyǵyna júgine alady.
