Aqmola túrmesindegi azaptaý isi: 12 qyzmetker sotta jaýap berip jatyr

ASTANA. KAZINFORM — Aqmola oblysynyń qylmystyq ister jónindegi mamandandyrylǵan aýdanaralyq sotynda sýdıa Saǵdat Seıitova men alqabılerdiń qatysýymen Qylmystyq-atqarý júıesi komıtetiniń (QAJK) 12 qyzmetkerine qatysty qylmystyq is qaralyp jatyr.

Eske salaıyq, qylmystyq qýdalaý organynyń málimetinshe, QAJK qyzmetkerleri Atbasar qalasyndaǵy № 1 mekemede jazasyn ótep jatqan sottalǵandarǵa qatysty QK 146-baby 3-bóliginiń 1-tarmaǵy «azaptaý» baby boıynsha aıyptalyp otyr.

Kelesi sot otyrysy prokýrordyń bir sottalýshyǵa qatysty «tyıym salynǵan tergeý ádisterin qoldaný» jónindegi júrgizilgen tekseris nátıjelerin jarııalaýynan bastaldy. Sottalýshynyń aıtýynsha, ony qorǵaýshysyz kýá retinde suraý kezinde Aqmola oblysy prokýratýrasynyń qyzmetkeri tergeýge «jol bermegeni» úshin «jabamyn» dep qorqytqan. Osyǵan baılanysty ol keıin ózin kúdikti retinde suraý barysynda da qysym bolady dep qaýiptengen. Alaıda arnaıy prokýror er adamnan alynǵan jaýap beınetirkeýmen jáne zań talaptaryna tolyq sáıkes júrgizilgenin aıtty. Prokýratýranyń málimdeýinshe, tekseris barysynda qysym kórsetý faktisi rastalmaǵan.

Sodan keıin sottalýshylardan jaýap alýǵa kóshti. Solardyń biri 2023 jyldyń tamyz aıynda № 1 mekemeniń jedel ýákili qyzmetin atqarǵan, búginde jumystan bosatylǵan. Aıypty moıyndamady. Sottalýshynyń aıtýynsha, 2023 jylǵy 21-nen 22 tamyzǵa qaraǵan túni mekemege kópsandy sottalǵandar legi jetkizilgen. Ol sol ýaqytta postta turǵan. Onyń sózinshe, avtozak esigi ashylǵan sátten bastap jańadan kelgenderge barlyq tártip túsindirilgen, keıin olar rentgenge jetkizilgen. Odan soń bárin sappen ashanaǵa alyp baryp, jeke-jeke tekserip, karantın bólimine ornalastyrǵan. Sonymen qatar ol kezde sottalǵandarǵa zańsyz áreket jasalmaǵan. Etap kelmeı turyp, naqty kimderdiń jetkiziletini nemese olarǵa kúsh kórsetý qajettigi jóninde eshqandaı nusqaý bolmaǵan. Sol ýaqytta sottalǵandardyń tarapynan da qandaı da bir shaǵym túspegen.

22 tamyz kúni de shaǵym bolmaǵan. Sol kúni prokýrormen birge mekemeni aralaý júrgizilgen. Al 23 tamyzda tintý bolyp, sottalǵandardyń bólmeleri men kereýetteri tekserilgen. Sottalýshy óz sózinde karantın ǵımaratyna kirmegenin, biraq aldyńǵy kúni kelgen sottalǵandardyń shaǵymdanyp jatqany týraly estigenin aıtty. Onyń sózinshe, sottalǵandar tártipke baǵynbaı, agressıvti áreket kórsetken. Oqıǵa bolǵan sátte de ol karantın bóliminiń ishinde emes, dálizde turǵan. Arnaıy qural qoldaný faktisin óz kózimen kórmegenin, tek keıin estigenin jetkizdi.

Sot barysynda sottalýshyǵa birqatar naqty suraqtar qoıyldy. Atap aıtqanda, «korıdorda sottalǵandardy aıqaılap doklad jasaýǵa májbúrleý, bireýiniń betinen urý, qoldy onyń kıimine súrtý, sondaı-aq basynan soqqy berý faktileri jóninde ne aıta alasyz?» degen saýal qoıyldy. Sondaı-aq oǵan «mekeme qyzmetkerleriniń sottalǵandarǵa qol jumsaǵanyn kórdińiz be?» dep te suraldy.

— Ondaı áreketter jasaǵan joqpyn, kórgen joqpyn, — dep jaýap berdi aıyptalýshy.

Іs materıaldary boıynsha, oǵan birneshe epızod taǵylǵan. Advokattyń aıtýynsha, «shaıhana» bólmesinde eki sottalǵandy uryp-soǵý, karantın bóliminiń bastyǵynyń kabınetinde «yntymaqtastyq týraly» qolhat alýǵa májbúrleý, bas tartqany úshin basynan urý, sanıtarlyq torapta ýnıtaz ishin jýdyrý sekildi aıyptar bar. Alaıda sottalýshy bulardyń eshqaısysyn moıyndamaı, karantınge kirmegenin, sottalǵandarmen janjaly bolmaǵanyn, nege ózin kórsetkenderin túsinbeıtinin aıtty.

Kameralardyń qaǵazben jabylǵanyn da baıqamaǵan.

Oqıǵadan keıin aýdan prokýrory arnaıy quraldardy qoldaný «zańdy boldy» degen qorytyndy shyǵarǵan. Alaıda bul sheshimdi keıin oblystyq prokýratýra joıǵan.

— Tazalyq júrgizýden bas tartý — arnaıy qural qoldanýǵa negiz bola ma? — dep suraldy.

Sottalýshy óz kezeginde bul ákimshiliktiń zańdy talaptaryna baǵynbaý, 60-bap… naqty tarmaǵyn esine túsire almaı turǵanyn aıtty. 

Sonymen qatar aıǵaqtardy qaraý kezinde jedel-tergeý toby qyzmetkerinde beınejazbalar men júıelik dıskterdiń bolmaǵany anyqtalǵandyqtan, ony jaýapqa shaqyrmaǵan — bul bólek tergeýdi talap etedi.

Sondaı-aq áleýmettik jelige taraǵan vıdeony anyqtaǵan Aqmola oblysy prokýratýrasynyń ókili de jaýap berdi. Degenmen oqıǵa ótkenine kóp ýaqyt bolǵandyqtan, egjeı-tegjeıli mán-jaıdy esine túsire almady. Vıdeonyń 3 qyrkúıek, jeksenbi kúni tirkelgeni de suraq týdyrdy.

Buǵan deıin, Aqmola Qylmystyq-atqarý júıesiniń 12 qyzmetkeriniń soty boıynsha kýágerlerden jaýap alynyp jatqanyn jazǵanbyz.