Aqmola turǵyny duǵany qaıtarý úshin alaıaqqa 600 myń teńge bergen
KÓKShETAÝ. QazAqparat – Aqmola turǵyny duǵany qaıtartý úshin alaıaqtyń qolyna 600 myń teńgeden astam aqshasyn ustatyp qoıa bergen, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, qarashanyń 8-de zardap shegýshiden polıtsııaǵa aryz túsirgen. Kókshetaý qalasynyń 26 jastaǵy turǵynynyń aıtýynsha, «Krıstına» esimdi áıel alaıaqtyq jolmen onyń anasynyń 600 myńnan astam aqshasyn jymqyryp ketken.
«Anyqtalǵandaı, zardap shekken adam áleýmettik jelide magııamen aınalysatyny týraly jarnamany kórip, onymen tanysqan. Duǵany qaıtarý úshin alaıaqqa aldymen 333 myń teńge, keıin taǵy 300 myń teńgeniń altyn buıymdaryn bergen», - deıdi vedomstvodan.
Jedel – izdestirý kezinde Bulandy aýdany Makınsk qalasynyń turǵyny, 34 jastaǵy áıel ustaldy.
«Kúdikti qylmysyn moıyndady. Onyń ústinen Qylmystyq kodekstiń 190 babynyń 1 bóligi «alaıaqtyq» boıynsha sotqa deıingi tergeý amaldary júrgizilýde. Kúdiktige qatysty «shaqyrǵanda kelip otyrý» protsessýaldyq mindetteý sharasy qoldanyldy», - dep tolyqtyrdy vedomstvodan.
