Aqmola turǵyny 14 jastaǵy qyzyn kóseýmen uryp, ıyǵyn syndyrǵan
KÓKShETAÝ. QazAqparat - Arshaly kentiniń turǵyny qyzyn kóseýmen uryp, ıyǵyn syndyrǵan, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, tártip saqshylary kámeletke tolmaǵandarǵa qatysty zorlyq-zombylyqty (psıhologııalyq, seksýaldyq jáne ózge de jáıtter) boldyrmaý maqsatynda otbasylardaǵy balalar zorlyq-zombylyǵyn anyqtaý jáne aldyn alý sharalaryn júrgizýde.
Máselen, polıtsııa bóliminde esepte turǵan Arshaly kentiniń 46 jastaǵy turǵyny «Kaspi Gold» bank kartasyn paıdalanǵan 14 jastaǵy qyzyn kóseýmen urǵan, saldarynan jasóspirimniń sol qolynyń ıyq býyny synǵan.
«Kúdiktige qatysty Qylmystyq kodekstiń 107-baby «Densaýlyqqa qasaqana ortasha zııan keltirý» boıynsha is qozǵalyp, sotqa deıingi tergeý amaldary júrgizilýde. Kúdiktige «shaqyrǵanda kelý mindettemesi» protsessýaldyq sharasy qoldanyldy. Sonymen birge, kúdiktiniń ústinen QR ÁQbK 461-baby «qorǵaý uıǵarymyn buzý» boıynsha ákimshilik is qolǵa alyndy», - deıdi vedomstvodan.
Aıta ketsek, jyl basynan beri Aqmola oblysynda tártip saqshylary turmysy nashar 799 ata-anany esepke qoıǵan. ÁQBtK-niń 127-baby boıynsha óz balasyn tárbıeleý nemese oǵan bilim berý jónindegi mindetterdi tıisinshe oryndamaıtyn 292 zańdy ókil ákimshilik jaýapqa tartyldy. Balany tárbıeleý jónindegi mindetti oryndamaıtyn 6 zańdy ókilge qatysty Qylmystyq kodekstiń 140-baby 2-bóligi boıynsha qylmystyq is qozǵaldy. 68 ata-ana quqyǵynan aıyrylsa, 15- ata-ananyń quqyǵy shekteldi.
