Aqmola turǵyny 13 jasar qyzdyń joǵalýyna qatysty túsinik bergennen keıin asylyp qalǵan
KÓKShETAÝ. QazAqparat – Aqmola oblysynda 13 jasar qyzdyń joǵalýyna baılanysty jaýap alynǵan er adam ózine-ózi qol saldy. Polıtsııa qylmystyq is qozǵady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, tamyzdyń 27-de Kókshetaý qalalyq PB kezekshi bólimine Krasnoıar kentiniń 30 jastaǵy turǵyny ózin óltirgeni týraly habar kelgen. Osy jaǵdaıǵa baılanysty Kókshetaý qalalyq PB Qylmystyq kodekstiń 105-baby 1 bóligi («Ózin-ózi óltirýge ıtermeleý») boıynsha is qozǵap, sotqa deıingi tergeý amaldaryn bastady.
«Atalmysh azamattan Áıgerim Haıdarovanyń joǵalýyna baılanysty kýáger retinde túsinik alynǵan. Jasóspirimdi izdeý boıynsha qolǵa alynǵan jedel-izdestirý sharasy kezinde 13 jasar qyzdy joǵalǵan kúni kórýi múmkin 200-den astam kýáger anyqtalyp, jaýap alyndy. Olardyń qatarynda kóz jumǵan er adam da boldy. Onyń kóligi beınebaqylaý kamerasyna túsip qalǵan. Jaýap alynǵan soń er adamdy PB ǵımaratynyń kire berisinde kútip turǵan anasy úıine alyp ketken», - deıdi vedomstvodan.
Vedomstvodan atap ótkendeı, jeke qaýipsizdik basqarmasy qyzmettik tergeý júrgizip jatyr.
«Qylmystyq istiń tergeý barysy Aqmola oblystyq PD bastyǵynyń jeke baqylaýynda», - dep tolyqtyrdy vedomstvodan.
