Aqmola turǵyndary segiz aıda jedel járdemge 172 myń qońyraý shalǵan

KÓKShETAÝ. QazAqparat - Aqmola oblysynda 8 aıda 172 myńnan astam ret jedel járdemge shaqyrtý boıynsha qońyraý shalynǵan. Bul týraly oblystyq jedel járdem stantsııasy bas dárigeriniń orynbasary Ásemgúl Qazızova málim etti, dep habarlaıdy QazAqparat tilshisi.

«Memlekettik qyzmet reglamentine sáıkes jedel járdem stantsııasyna kelip túsetin shaqyrýlar jedeldiktiń tórt sanaty boıynsha bólinedi. Shuǵyl qońyraýlardyń birinshi, ekinshi jáne úshinshi sanattary boıynsha jedel medıtsınalyq járdem stantsııasy kómek kórsetedi. Tórtinshi sanat boıynsha-alǵashqy medıtsınalyq sanıtarlyq kómek bólimsheleri», - deıdi Ásemgúl Qazızova.

Feldsherlik jáne mamandandyrylǵan brıgadalardyń dıspetcherden shaqyrtý alǵan sátten bastap naýqastyń turǵan jerine deıingi kelý ýaqyty birinshi shuǵyldyq sanaty boıynsha – 10 mınýtqa deıin (naýqastyń jaı - kúıi, ómirge tikeleı qater tóndiredi), ekinshisi boıynsha – 15 mınýtqa deıin (naýqastyń jaı-kúıi medıtsınalyq kómek kórsetýsiz ómirge yqtımal qater tóndiredi), úshinshisi boıynsha – 30 mınýtqa deıin (naýqastyń jaǵdaıy medıtsınalyq kómek kórsetýsiz densaýlyqqa yqtımal qaýip tóndiredi), jedeldiktiń tórtinshi sanaty – bir saǵatqa deıin (naýqastyń jaǵdaıy jedel aýrýdan nemese sozylmaly aýrýdyń órshýinen, aǵzalar men júıelerdiń kenetten jáne aıqyn buzylýynsyz, naýqastyń ómiri men densaýlyǵyna tikeleı jáne yqtımal qaýip bolmaǵan kezde).

Búgingi tańda 8 aıdyń qorytyndysy boıynsha óńirde 172 myńnan astam jedel medıtsınalyq kómek shaqyryldy.

Jaqynda oblystyq jedel medıtsınalyq járdem stantsııasy ákimshiliginiń bastamasymen jiti koronarlyq sındrom kezinde jedel medıtsınalyq kómek kórsetý algorıtmi boıynsha eki kúndik semınar uıymdastyryldy. Onda medıtsına ǵylymdarynyń doktory, professor, S. Asfendııarov atyndaǵy QazUMÝ Qosymsha kásibı bilim berý ınstıtýtynyń terapevtik pánder kafedrasynyń meńgerýshisi Gúlnar Bedelbaeva sóz sóıledi.

Semınarǵa oblystyq jedel medıtsınalyq járdem stantsııasynyń 75-ten astam medıtsına qyzmetkeri qatysyp, onlaın rejımde 48 feldsher oqytyldy.

Jedel medıtsınalyq járdem dárigerleri óz sheberlikterin arttyrýdy jalǵastyrýda. Sonymen qatar, aqmolalyqtar «aq halatty perishtelerdiń» jumysyn oń baǵalayp otyr.

Máselen, dertine baılanysty kún saıyn jedel járdem shaqyrtyp júrgen Kókshetaý qalasynyń turǵyny Aısulý Baýbaqova óziniń ómirine arasha túsip júrgen aq halaqty abzal jandardyń barlyǵynyń esimderin biledi jáne olardyń jumysyna shynaıy rızashylyǵyn bildirýde.

«Jedel járdem brıgadasyndaǵy qyzmetkerlerdiń barlyǵy óz mamandyqtarynyń kásibı sheberleri. Únemi ýaqytyly kelip, kómek qolyn sozýda. Barlyǵy óte sypaıy jáne ár saýalyma qınalmaı jaýap beredi. Men bárin esimderimen bilemin, óıtkeni olar meniń balalar sııaqty. Bizdiń ómirimiz úshin janyn salyp júrgen olarǵa alǵysym sheksiz», - deıdi turǵyn.

Aıta ketsek, táýlik boıy Aqmola oblysy boıynsha 68 jedel medıtsınalyq kómek brıgadasy jumys isteıdi. Olar 783 myń aqmolalyqqa qyzmet kórsetedi. Tek oblys ortalyǵynda táýligine jedel járdem dárigerleri 300 - ge deıin, oblys boıynsha-600-den 1000-ǵa deıin shyǵýdy júzege asyrady. Máselen, 2021 jyldyń 12 aıynda óńirde 313,5 myń shaqyrý boıynsha qyzmet kórsetildi.

Eske sala ketsek, budan buryn Aqmola oblysynda týberkýlezdiń aldyn alý sharalary qalaı júrgizilip jatqanyn jazǵan edik.