Aqmola, SQO, ShQO-da sý tasqyny kezeńi mamyr aıynyń basyna deıin jalǵasady
NUR-SULTAN. QazAqparat – Sınoptıkter 25 sáýir - 1 mamyr aralyǵyndaǵy aptalyq gıdrologııalyq boljamyn jarııalady. Boljamǵa sáıkes Aqmola, Soltústik Qazaqstan jáne Shyǵys Qazaqstan oblystarynda sý tasqyny kezeńi mamyr aıynyń birinshi onkúndigine deıin jalǵasady, dep habarlaıdy QazAqparat Qazgıdrometke silteme jasap.
2020 jylǵy 17-23 sáýir aralyǵynda Qazaqstan aýmaǵynyń qar jamyl,ysy alańy qysqardy jáne ol barlyq aýmaqtyń 2 paıyzynda qalǵan. Bul NASA spýtnıkteriniń jerdi qashyqtyqtan zondtaý barysynda túsirgen ári «Qazgıdromet» óńdegen sýretterden kórinedi.
«Batys Qazaqstan, Aqtóbe, Atyraý, Qostanaı jáne Qaraǵandy oblystarynda ózenderde sý deńgeıinde azdap aýytqý bolýy yqtımal, biraq kóktemgi sý tasqynynyń bıik shegi ótti.
Jambyl, Túrkistan, Shyǵys Qazaqstan jáne Almaty oblystarynda jazyq jáne taý bókterindegi aýmaqtarda qar jamylǵysy tolyǵymen eridi. Odan ári jaǵdaı jaýyn-shashynnyń temperatýralyq rejımine jáne qatty nóserdiń jaýýyna orta taýdaǵy (2 000 m deıin) jáne bıik taýdaǵy (2000 metrden joǵary) qardyń erý qarqynyna baılanysty bolady», delingen habarlamada.
Aqmola, Soltústik Qazaqstan jáne Shyǵys Qazaqstan oblystarynda sý tasqyny kezeńi mamyr aıynyń birinshi onkúndigine deıin jalǵasady.
«Apta boıy aýa raıy qubylmaly bolady, naızaǵaıly jańbyr jaýady, ekpindi jel soǵady. Soltústik óńirlerde jańbyr arty qarǵa ulasýy múmkin. Elimizdiń soltústik-batysynda jáne ońtústiginde qatty nóser jaýyp, túngi temperatýra mınýsqa deıin tómendeýi boljandy. Osyǵan baılanysty Túrkistan, Jambyl jáne Almaty oblystarynyń ózenderinde sý deńgeıiniń kóterilýi boljanýda», delingen habarlamada.
Spýtınık túsirgen sýretterge sáıkes Shyǵys Qazaqstan oblysynyń taý ózenderinde qar jamylǵysy 8 paıyz shamasynda. Sınoptıkalyq boljam negizinde aldaǵy aptada oblysta jaýyn-shashyn túsedi, sondaı-aq orta taýlardaǵy qar jamylǵysy erıtindikten, atalmysh ózenderdiń sýynyń artýy kútiledi.
