Aqmola polıtsııasy joǵalǵan adamdardy izdeýde drondardy qalaı qoldanady
ASTANA. KAZINFORM — Aqmola polıtsııasynda drondardy basqarý daǵdylaryn jetildiretin zerthana iske qosyldy, dep habarlaıdy Іshki ister mınıstrliginiń baspasóz qyzmeti.
Aqmola oblysynyń polıtsııa departamentinde ushqyshsyz ushý apparattaryn (UUA) basqarý jáne qyzmettik mindetterdi oryndaý kezinde tıimdi paıdalaný daǵdylaryn jetildirýge arnalǵan oqý-jattyǵý zerthanasy ashyldy.
Jańa zerthanada polıtsııa qyzmetkerleri drondardy basqarý boıynsha praktıkalyq daǵdylaryn jetildirip, olardy túrli qyzmettik jaǵdaıda qoldanýdy úırenedi. Sondaı-aq arnaıy jattyǵý alańynda pılottyq sheberlikterin shyńdap, qurylǵylarǵa tehnıkalyq qyzmet kórsetý jáne dıagnostıka júrgizý tártibin meńgeredi.
— Ushqyshsyz apparattardyń basty artyqshylyǵy – qysqa ýaqyt ishinde aýqymdy aýmaqtardy, sonyń ishinde jetýi qıyn jerlerdi zertteýge múmkindik berýi. Joǵary ajyratymdylyqtaǵy kameralarmen jáne jylý túsirgish quraldarmen jabdyqtalǵan drondar táýliktiń qarańǵy ýaqytynda da izdestirý jumystaryn júrgizýge múmkindik beredi, — deıdi tártip saqshylary.
Bul tehnologııalar polıtsııa qyzmetinde qazirdiń ózinde tıimdi qoldanylyp keledi. Jyl basynan beri drondar joǵalǵan azamattardy izdeý kezinde 12 ret, aýyl sharýashylyǵy janýarlaryn izdestirý barysynda 21 ret paıdalanylǵan.
Budan bólek, ushqyshsyz apparattardy kúdiktilerdi izdeý, aýmaqty sholý jáne oqıǵa oryndaryn zerdeleý kezinde qoldanýǵa bolady.
Zamanaýı tehnologııalardy polıtsııa jumysyna engizý izdestirý sharalarynyń tıimdiligin arttyryp, úlken aýmaqtardy qysqa merzimde qamtýǵa jáne oqıǵalarǵa jedel áreket etýge múmkindik beredi.
Budan buryn ShQO polıtsııasy daýysy bar drondardy iske qosqanyn jazǵanbyz.
