Aqmola polıtseıleri Kóbeıtuz kólinde baqylaýdy kúsheıtti

ASTANA. KAZINFORM — Áleýmettik jelilerde týrısterdiń Kóbeıtuz kólinen tuz qazyp jatqan vıdeosy taraǵannan keıin, polıtseıler demalýshylar men jergilikti turǵyndarǵa sý aıdynyndaǵy tártip saqtaý erejelerin eske saldy. 

Aqmola oblystyq polıtsııa departamentiniń málimetinshe, erekshe qorǵalatyn tabıǵı nysan — Kóbeıtuz qyzǵylt kólin saqtaý maqsatynda Ereımentaý aýdanynyń tártip saqshylary tótenshe jaǵdaılar bólimi jáne jergilikti atqarýshy organdardyń ókilderimen birlesip reıdter júrgizýge kiristi.

— Basty mindet — qoǵamdyq tártipti saqtaý ǵana emes, kól ekojúıesiniń buzylýyna jol bermeý. Azamattardy tabıǵat murasyna uqyppen qaraýǵa shaqyramyz: kól túbinen tuz qazbańyzdar, jaǵalaýdy jáne sý aıdynyn lastamańyzdar, qaýipsiz demalys erejelerin saqtańyzdar, — dep málimdedi polıtsııa qyzmetkerleri.

Erejeni buzǵan azamattar ákimshilik jaýapkershilikke tartylady.

Sondaı-aq, demalýshylar úshin kól aýmaǵynda minez-qulyq jáne qaýipsizdik erejeleri jazylǵan aqparattyq taqtaıshalar ornatylǵan.

Eske salsaq, birshama jyl buryn qyzǵylt tústi Kóbeıtuz kóline kóligimen kirip ketken azamattyń fotosýreti áleýmettik jelide qyzý talqylanǵan bolatyn. Aqmola oblysynyń polıtsııa qyzmetkerleri ol júrgizýshini ustap, ákimshilik kodekstiń eki baby boıynsha jaýapqa tartty.