Aqmola polıtseıleri jolda qalǵan ózbekstandyqtardy qutqardy
KÓKShETAÝ. QazAqparat - Aqmola polıtseıleri «Nur-Sultan – Petropavl» avtokólik jolynda isten shyǵyp, toqtaýǵa májbúr bolǵan avtobýs júrgizýshilerine bes kún boıy kómek kórsetken, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, patrýldik polıtsııa batalonynyń 2 vzvodynyń ekıpajy, polıtsııa starshınasy Igor Makarov pen polıtsııanyń aǵa serjanty Dýman Álmenbaev túngi aýysymǵa shyqqan kezinde «Nur-Sultan – Petropavl» tas jolynyń boıynda toqtap turǵan «Vanhoo» jolaýshylar avtobýsyn kóredi. Avtobýstyń qozǵaltqysh tetigi isten shyqqan.
«Avtobýsta Ózbekstan Respýblıkasynyń 15 azamaty boldy. Kólik «Ekaterınbor- Taraz» baǵyty boıynsha júrip kele jatqan. 26 qarashada joldyń 243 shaqyrymynda avtobýstyń qozǵaltqysh tetigi isten shyǵyp, toqtaýǵa májbúr bolǵan. Tártip saqshylary jolaýshylardy ótip bara jatqan kólikterge otyrǵyzyp jiberdi. Al, ózderi synǵan avtobýsti jóndegenshe bes kún boıy júrgizýshilerge kómek kórsetti», - deıdi vedomstvodan.
PD baspasóz qyzmeti atap ótkendeı, qıyn jaǵdaıǵa dýshar bolǵan kezde, kómek qolyn sozǵan tártip saqshylaryna avtobýs júrgizýshileri men jolaýshylary shynaıy alǵystaryn bildirdi.
