Aqmola polıtseıleri jolda qalǵan 1200 kóliktiń saparyn jalǵastyrýyna kómektesti
KÓKShETAÝ. QazAqparat - Aýa raıynyń nasharlaýyna baılanysty (kóktaıǵaq, qar aralas jańbyr jáne boran) jol-kólik oqıǵalaryn boldyrmaý úshin Aqmola oblystyq polıtsııa departamentiniń qyzmetkerleri respýblıkalyq jáne oblystyq mańyzy bar avtokólik joldarynda qaýipsizdikti qamtamasyz etti, dep habarlaıdy QazAqparat tilshisi.
Vedomstvonyń málimetinshe, aqpannyń 18-de oblys joldarynda aýa raıynyń qolaısyzdyǵynan týyndaǵan kúrdeli jaǵdaı saqtaldy.
Barlyq baǵyttaǵy joldarda qozǵalys jabyldy.
Aýmaqtyq polıtsııa departamentiniń qyzmetkerleri aýa raıynyń nasharlaýyna baılanysty jol-kólik oqıǵalaryna jol bermeý boıynsha barlyq qajetti sharalardy qabyldady.
Tártip saqshylary kóktaıǵaq pen boran jaǵdaıynda júrgizýshiler men jolaýshylardyń qaýipsizdigin qamtamasyz etip, avtokólik ıelerine mejeli jerge jetýge kómektesti.
«Nur-Sultan-Petropavl» jáne «Ereımentaý-Shiderti» avtojoldarynda qar kóshkini saldarynan 50-ge jýyq avtokólik buǵattaldy.
Júrgizýshilerdiń qaýipsiz júrip-turýyn qamtamasyz etý jáne úsip qalýyna jol bermes úshin polıtseıler kolonnaǵa avtokólikter salýdy uıymdastyrdy, qar jınaıtyn tehnıkany tartty jáne turyp qalǵan kólik quraldaryn belgilengen jerge deıin alyp júrdi.
Jolaýshylar arasynda jas balalar men qart adamdar boldy, olarǵa polıtseıler qajetti kómek kórsetti.
«Keshki saǵat 20:00-de avtokólik keptelisine baılanysty patrýldik polıtsııa rotasy ekıpajdarynyń qyzmetkerleri 1206 avtokólikten turatyn avtokolonnanyń qozǵalysyn qamtamasyz etti, onyń 1033 - jeńil jáne 173 - aýyr júk kóligi» deıdi vedomstvonyń baspasóz qyzmetindegiler.
Polıtseıler jolda qalǵan kólikterdiń qozǵalysynyń qaýipsizdigin qamtamasyz etýge aýa raıynyń kúrt nasharlaýy kedergi keltirgenin aıtyp otyr.
«Túnde jaǵdaı shynymen ońaı bolǵan joq. Joldyń jabylýy men burqasynnyń saldarynan 1000-nan astam avtokólik jınaldy. Qazirgi ýaqytta joldardaǵy jaǵdaı turaqty jáne patrýldik polıtsııa ekıpajdarynyń baqylaýynda», - deıdi patrýldik polıtsııa batalonynyń komandıri, polıtsııa podpolkovnıgi Azamat Baıǵazın.
Aıta keteıik, aýa raıynyń nasharlaýyna baılanysty patrýl polıtsııa qyzmetkerleri kúsheıtilgen rejımde jumys isteýde.
Respýblıkalyq jáne oblystyq mańyzy bar trassalarda 76 patrýlge qosymsha ekıpajdar engizildi.
Eldi mekenderge kirip-shyǵý joldaryna 48 beket qoıyldy.
Barlyq júrgizýshilermen profılaktıkalyq áńgime júrgizildi.
