Aqmola polıtseıleri myńnan astam kólik júrgizýshisine kómek kórsetti
KÓKShETAÝ. QazAqparat - Aqmola oblystyq polıtsııa departamentiniń qyzmetkerleri boranda jolda qalǵan júrgizýshilerge kómek kórsetti, dep habarlaıdy QazAqparat tilshisi.
Vedomstvonyń málimetinshe, sońǵy kúnderi oblys joldarynda aýa raıynyń qolaısyzdyǵynan týyndaǵan kúrdeli jaǵdaı saqtaldy. Barlyq baǵyttaǵy joldarda qozǵalys jabyldy. Aýmaqtyq polıtsııa departamentiniń qyzmetkerleri aýa raıynyń nasharlaýyna baılanysty jol-kólik oqıǵalaryna jol bermeý boıynsha barlyq qajetti sharalardy qabyldady. Tártip saqshylary kóktaıǵaq pen boran jaǵdaıynda júrgizýshiler men jolaýshylardyń qaýipsizdigin qamtamasyz etip, avtokólik ıelerine mejeli jerge jetýge kómektesti.
Patrýldik polıtsııa rotasynyń 5 ekıpajy 1203 avtokólikten turatyn avtokolonnanyń qozǵalysyn qamtamasyz etti, onyń 923 - jeńil jáne 280 - aýyr júk kóligi.
«Sonymen birge, oblys aýmaǵynda 80 qyzmetkerden turatyn 38 mobıldi beket jáne 38 birlik patrýldik avtokólik qoıyldy, olar eldi mekenderden jáne respýblıkalyq mańyzy bar avtojoldardan shyǵý kezinde qyzmet atqardy», - dep atap ótti Jergilikti polıtsııa qyzmetiniń bastyǵy Serik Baımuqanov.
Polıtsııa qyzmetkerleri júrgizýshilerge jolǵa shyqqanda saq bolýdy, sondaı-aq, aýa-raıynyń qubylysyna nazar aýdaryp, daýyldy eskertýlerge qulaq asýǵa, jolda qıyn jaǵdaıǵa tap bolǵan kezde dereý 102 telefonyna habarlaýdy suraıdy.
Al, oblystyq TJD baspasóz qyzmetinen atap ótkendeı, boran men kóktaıǵaqtyń saldarynan «Almaty-Ekaterınbor» tas jolynyń 931 shaqyrymynda Nur-Sultan qalasynan Polshaǵa jol júrip bara jatqan Belarýs azamatynyń «DAF» jabyq júk kóligi joldan shyǵyp ketken bolatyn. Oǵan TJB men polıtsııa qyzmetkerleri, DEÝ-4 jumysshylary jergilikti atqarýshy organdarmen birlesip, qarǵa batyp qalǵan júk kóligin shyǵarýǵa kómektesti.
