Aqmola: Polıtseıler janyp jatqan úıdegi adamdardy qutqaryp qaldy
KÓKShETAÝ. QazAqparat - Aqmola oblysynda polıtsııa qyzmetkerleri janyp jatqan úıdegi adamdarǵa kómekke kelip, qutqardy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, órt qańtardyń 8-de túnde Kókshetaý qalasynyń Zastantsıonnyı kentinde bolǵan.
Túngi kezekshilikte júrgen «Ásker-4» avtopatrýl vzvod komandıriniń orynbasary, polıtsııa aǵa leıtenanty Amanjol Daıyrov jáne polıtsııa aǵa leıtenanty Aqan Ábilqaıyrov órt shyqqan úıge baryp, turǵyndardy qutqardy.
Polıtsııa qyzmetkerlerimen birge sol mańnan ótip bara jatqan beıtanys adamdar da kómekke umtyldy. Órtengen úıde otbasylyq jup bolǵan.
«Qyzyl jalyn úıdiń kireberisinde tutanǵandyqtan olar syrtqa óz betinshe shyǵa almaǵan. Abyroı bolǵanda, qyraǵy tártip saqshylary men turǵyndar olardy aman-esen syrtqa alyp shyqty» dedi vedomstvodan.
Anyqtalǵandaı, órt elektr symynyń qysqa tuıyqtalýynan oryn alǵan.
Órt úıdiń kireberisi men shatyryn sharpyǵan.
Qazirgi kezde saraptama taǵaıyndalyp, mán-jaıy anyqtalyp jatyr.
