Aqmola orman sharýashylyǵynyń brıgadıri ómiriniń 31 jylyn tabıǵatty qorǵaýǵa arnaǵan
KÓKShETAÝ. KAZINFORM — Orman sharýashylyǵy qyzmetkerleri kúni jáne «Jumysshy mamandyqtar jyly» aıasynda «Býrabaı» memlekettik ulttyq tabıǵı parkiniń baspasóz qyzmeti ómiriniń 31 jylyn tabıǵatqa qyzmet etýge arnaǵan Barmashın orman sharýashylyǵy ýchaskesiniń orman sharýashylyǵy sheberi Esimtaı Qurmanqulovpen suhbat qurdy, dep habarlaıdy Kazinform tilshisi.
Býrabaı tek ulttyq saıabaq emes, bul — tiri aǵza. Onda árbir aǵashtyń, bulaqtyń jáne janýardyń óz róli bar. Biraq bul aǵzanyń ómir súrýi, tynys alýy jáne tabıǵı sulýlyǵyn, kelbetin bolashaq urpaqqa qaldyrýy úshin onymen úndese, selbese ómir súretin adamdar qajet. Sondaı jandardyń biri — «Býrabaı» memlekettik ulttyq parkiniń Barmashın orman sharýashylyǵy mekemesiniń orman sharýashylyǵy sheberi — Esimtaı Qurmanqulov.
Búgingi keıipkerimizdiń orman sharýashylyǵynda 31 jyldyq tájirıbesi bar.
— Men ormannyń janynda týyp óstim. Bala kezimnen barlyq ýaqytym sol jaqta ótti. Sodan da shyǵar, tabıǵatty baqylaýdy unatatynmyn. Ásirese aǵashtardyń qalaı ósetinin, janýarlardyń ózin qalaı ustaıtynyn, ormandaǵy barlyq nárseniń óz zańdary boıynsha qalaı áreket etetinin kórý maǵan erekshe demalys syılaıdy. Áskerden keıin men orman sharýashylyǵy kolledjine oqýǵa tústim jáne bar ynta-jigerimdi, kúsh-qýatymdy, mahabbatymdy osy salaǵa arnaýdy jón dep sheshtim, - deıdi Esimtaı.
Ol sondaı-aq «Býrabaı» memlekettik ulttyq tabıǵı parkin saqtaýdyń mańyzdylyǵyna toqtaldy.
— Býrabaı — sulýlyq mekeni. Men kún saıyn tabıǵattyń osy bir erekshe buryshyn bolashaq urpaq úshin saqtaýdaǵy bizdiń jumysymyzdyń qanshalyqty mańyzdy ekenin kóremin, - deıdi ormanshy.
Keıipkerimizdiń aıtýynsha, orman sharýashylyǵy brıgadıriniń jumys kúni tań ata bastalady. Olarǵa patrýldeý, orman densaýlyǵyn tekserý, órt qaýipsizdigin baqylaý, týrıstik maýsymda qoqys shyǵarý, qysta jabaıy janýarlardy azyqtandyrý kiredi.
— Ormanda ótken ár kún bir-birine uqsamaıdy. Ár kún jańa tapsyrmalardy oryndaımyz. Jazda týrıster kóp keletin kezde qoqystardy tazalap, órttiń aldyn alý jumystaryn júrgizemiz. Al qysta jabaıy janýarlarǵa jem beremiz, - dep sózin jalǵastyrdy orman saqshysy.
Esimtaı ormanshy muqııat ári jaýapty jáne fızıkalyq tózimdi bolýy kerek dep sanaıdy.
— Tabıǵatty súıip qana qoımaı, ony qorǵaýdy da bilý kerek. Orman nemquraıdylyqty keshirmeıdi. Naǵyz ormanshy qaýipti aldyn ala boljap, shuǵyl áreket ete bilýi kerek, - deıdi ol.
Birneshe jyl buryn «Býrabaı» memlekettik tabıǵı saıabaǵynyń qyzmetkerleri taýdan tútin shyqqanyn anyqtaǵan. Ýaqtyly áreket etý iri órttiń aldyn aldy. Brıgadırdiń aıtýynsha, olar ormandy ǵana emes, tutas ekojúıeni saqtap qalǵan.
— Biz ataq-dańq úshin jumys istep jatqan joqpyz. Biraq taza soqpaqpen júrip, jas aǵashtardy, qaıtyp kele jatqan janýarlardy kórgende, boıymyzdy maqtanysh sezimi kerneıdi. Bul — bizdiń jumysymyzdyń jemisi. Eń bastysy, adamdar men tabıǵat arasyndaǵy tepe-teńdikti saqtaýymyz kerek. Biz tek ormandy qorǵap qana qoımaımyz, onyń ómir súrýine jáne gúldenýine kómektesemiz, sondaı-aq adamdarǵa ony qorǵaýdy úlgi etip, úıretemiz, - deıdi Esimtaı Qurmanqulov.
Eske sala keteıik, buǵan deıin endi Býrabaıda týrıster qaýipsizdigin jasandy ıntellekt kúzetetinin jazǵan edik.