Aqmola óńirinen shyqqan soǵys ardagerleri týraly jańa jınaq tanystyryldy
«Nur-Sultan qalasy ákimdiginiń qoldaýymen qalalyq Ardagerler keńesi «Uly Jeńis eshqashan umytylmaıdy» kitabyn shyǵardy. Bul jınaq Jeńistiń 75 jyldyǵyna arnalǵan. Qalalyq ardagerler keńesi ótken jyldyń jeltoqsan aıynda kitap shyǵarý týraly bastama kótergen edi. Keńes sheshimimen jýrnalısterden redaktsııalyq top quryldy. Topty jýrnalıst Ǵalııa Baltabaı basqardy. Sol jınaqty búgin resmı tanystyryp otyrmyz. Munda Nur-Sultan qalasy men Aqmola oblysynan shyqqan ardagerlerdiń erligi baıandalady», - dedi Nur-Sultan Qoǵamdyq keńesiniń tóraǵasy, saıası jáne qoǵam qaıratkeri Sansyzbaı Esilov elorda ákimdiginde ótken onlaın brıfıngte.
Atap aıtqanda, jınaqta Aqmola óńirinde týyp-ósken Keńes Odaǵynyń eki dúrkin batyry Talǵat Bıgeldınov, Qazaqstannyń alǵashqy qorǵanys mınıstri Saǵadat Nurmaǵambetov, Dańq ordeniniń kavaleri Álmuqan Sembınov, reıhstagqa tý tikken Raqymjan Qoshqarbaev syndy batyrlar men tyl ardagerleri engen.
«Sońǵy kezderi Uly Otan soǵysynyń qandaı tarıhı máni bar degen pikirler aıtylyp júr. Soǵys ardagerleriniń eńbegi elenbeı qalǵan kez boldy. Tipti Baýyrjan Momyshuly kózi tirisinde Keńes odaǵynyń batyry ataǵyn ala almady. Raqymjan Qoshqarbaevtyń reıhstagqa tý tikkenin 62 jyldan keıin ǵana moıyndadyq. Ushqysh qyzdardan Hıýaz Dospanovany ǵana aıtyp júrmiz. Bul kitapqa Dámeli Jákeev, Mádına Ysqaqova, Qamqa Úmbetalına degen ushqyz qyzdar týraly materıaldar endi. Jalpy Aqmola oblysy - batyrlardyń ólkesi. Keńester odaǵynyń batyry ataǵyn Qazaqstanda 500 jaýyngerge berse, sonyń 44-i Aqmola óńirinen shyqqan», - dedi jýrnalıst Ǵalııa Baltabaı.
