Aqmola óńirinde Jas ólketanýshylardyń kishi akademııasy quryldy

ASTANA. QazAqparat - Aqmola oblysynyń ákimi Málik Myrzalın «Bolashaqqa baǵdar: Rýhanı jańǵyrý» maqalasynda aıtylǵan mindetterdi oryndaý baǵytynda óńirde qarqyndy jumys júrgizilip jatqanyn málim etti, dep habarlaıdy «QazAqparat» HAA tilshisi.

Óńir basshynynyń aıtýynsha, «Rýhanı jańǵyrý» baǵdarlamasy sheńberinde  10,6 mlrd teńgege 117 joba júzege asyrylǵan. Atalǵan qarajattyń 5,2 mlrd teńgesin demeýshiler bólgen.

«Sakraldy eskertkishterdiń respýblıkalyq kartasyna Aqmola oblysynan 10 oryn engizildi. Oblystyq ólketaný murajaıynyń ekspozıtsııasy 3D formatynda jańartylyp, «Qasıetti geografııa» arnaıy jobasy aıasynda oblystyń ejelgi tarıhı jerlerinde ǵylymı-zertteý jumystary men qazba jumystary júrgizildi. Oblystyń qasıetti jerleriniń albomy jaryq kórdi», - deıdi Málik Myrzalın.

Onyń aıtýynsha, aımaqpen tanysyp, onyń tarıhy men kórikti oryndaryn jas urpaqqa tanytý úshin Jas ólketanýshylardyń kishi akademııasy qurylǵan. Ekspedıtsııalyq toptar jumys atqaryp, mektep baǵdarlamasyna «Aımaqtyq zertteýler» atty fakýltatıvter engizilgen. Oblys ákimdiginiń aqparatyna sáıkes, akademııa tolyq qýattaǵy jumysyn 2018 jyly bastaıdy. Aýdandar men qalalarda akademııanyń bólimderin ashý kózdelgen.

«Bul jumystardyń basty maqsaty - ósip kele jatqan urpaqqa óz jerine, eline súıispenshiligin  kúsheıtý. «Týǵan jer» bastamasy boıynsha bıznes-qoǵamdastyqtar men óńirdiń turǵyndarynyń bastamasymen qalalar men aýyldardy abattandyrý, áleýmettik nysandardy turǵyzý, sport alańdaryn jáne basqa da áleýmettik mańyzdy jobalardy uıymdastyrý boıynsha jobalar júzege asyrylýda», - deıdi Málik Myrzalın.