Aqmola óńirinde Týǵan jer baǵdarlamasyn iske asyrýǵa áleýmettik jeliler paıdalanylmaq

KÓKShETAÝ. QazAqparat - Kókshetaýda aımaq basshysy Málik Myrzalınniń tóraǵalyǵymen ótken jıynda «Týǵan jer» baǵdarlamasyn iske asyrý máseleleri qaraldy, dep habarlaıdy "QazAqparat" HAA tilshisi əkimdiktiń baspasóz qyzmetine silteme jasap.

Jıynǵa qoǵamdyq birlestikterdiń, saıası partııalardyń, «Atameken» ulttyq kásipkerler palatasynyń ókilderi, BAQ jáne memlekettik organdardyń basshylary qatysty.

Oblystyq ishki saıasat basqarmasynyń basshysy A. Mysyrálımovanyń aıtýynsha, jobanyń negizgi tujyrymy 4 bloktan turady - bilim, aımaqtyq mádenıet, kásipkerlerdi qoldaý jáne baǵdarlamanyń iske asyrý barysyn kópshilikke jetkizý. Sondaı-aq A. Mysyrálımova búgingi kúni «Týǵan jer» baǵdarlamasyn júzege asyrý maqsatynda jumys toby qurylǵanyn jáne onyń quramyna qoǵamdyq uıymdar, etno-mádenı birlestikter jáne bıznes salasynyń ókilderi engenin atap ótti.

Óz kezeginde aımaq basshysy atalmysh baǵdarlamany óńirde júzege asyrý jumystaryna mamandar men áleýmettik jeli belsendilerin de kóptep tartýdy tapsyrdy.

Sondaı-aq jıynda «Týǵan jer» baǵdarlamasyn júzege asyrýdyń is-sharalar jospary usynyldy. Atalǵan jospar 150-den astam sharany qamtıdy. Munda oblystaǵy tarıhı-mádenı jádigerler, týrızm nysandary, tabıǵı qoryqtar tizimin jasaý jáne aqparattardy bir jerde shoǵyrlandyratyn tanymdyq ınterten-portal qurý mindetteri qarastyrylǵan.

Jıyn qorytyndysy boıynsha  «Týǵan jer» baǵdarlamasyn iske asyrýǵa atsalysatyn jumys toby quramyndaǵy «Joba keńsesi», «Basqarý» jáne «Saraptama» toptarynyń quramy bekitildi.