Aqmola oblysynyń turǵyny ushaq arqyly bekire balyǵyn alyp ótpek bolǵan
ORAL. QazAqparat – Aqmola oblysynyń turǵyny ushaq arqyly bekire balyǵyn alyp ótpek bolǵan, dep habarlaıdy QazAqparat tilshisi.
Oral qalasy stansasy jelilik polıtsııa bólimi málim etkenindeı, atalǵan áıel «Bekire-2021» jedel aldyn alý sharasy barysynda áýejaıda «Air Astana» áýe kompanııasy №980 «Oral-Nur-Sultan» reısi jolaýshylaryn tekserý kezinde ustaldy.
Aqmolalyq turǵynnan tıisti qujaty joq, jańadan muzdatylǵan salmaǵy 9 kg eki bekire balyǵy tabyldy.
Qazirgi kezde áıelge qatysty QR QK 339-babyna (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes sotqa deıingi
tergeý amaldary júrgizilýde. Bul bap boıynsha aıypty dep tanylǵan adamǵa múlki tárkilenip, bas bostandyǵynan aıyrylýǵa deıin jaza qarastyrylǵan.
