Aqmola oblysynyń turǵyny blokposttaǵy polıtsııa qyzmetkerine alǵys aıtty
NUR-SULTAN. QazAqparat – Kókshetaý tasjolyndaǵy blokpostta kezekshilikte turǵan polıtsııa leıtenanty qala mańyndaǵy naýqasty Nur-Sultan qalasyndaǵy aýrýhanaǵa jetkizýge kómektesti, dep habarlaıdy QazAqparat.
Elde jarııalanǵan tótenshe jaǵdaı kezinde polıtsııa qyzmetkerleriniń jumysy kúsheıtilgen rejımge kóship, olarǵa artylǵan jaýapkershilik eselene túskeni belgili. Bul rette quqyq qorǵaý organynyń ókilderi halyqtyń tynyshtyǵy men qaýipsizdigin kúzetip qana qoımaı, qıyn sátte shuǵyl kómekke muqtaj jandarǵa da qol ushyn sozyp, kópshiliktiń alǵysyn alýda.
Osyndaı azamattardyń biri, Nur-Sultan qalasy Polıtsııa departamenti patrýldik polıtsııasy polkiniń ınspektory, polıtsııa leıtenanty Berikbol Kóksegen 15 sáýirde Kókshetaý tasjolyndaǵy blokpostta kezekshilikte bolǵan. Qyzmet barysynda ınspektorǵa Gúlnara Moldasheva esimdi azamat qala mańynda turatyn aǵasynyń naýqastanyp qalǵanyn, ony tez arada Nur-Sultanǵa jetkizý kerektigin aıtyp habarlasady.
Polıtsııa leıtenanty mundaı ótinishke beı-jaı qaramaı, naýqas azamatty bekette qalyptasqan kólik nópirinen jyldam ótkizip, aýrýhanaǵa jetkizýge kómektesken.
Polıtsııa ınspektorynyń qyzmetine rıza bolǵan Gúlnara Moldasheva áleýmettik jeli arqyly oǵan alǵys aıtty.
«Şýchınsktiń shyǵa berisinde turǵan blokpostta kezekshilikte turǵan Berik esimdi polıtsııa leıtenantyna alǵys aıtam. Qala syrtynda turatyn aǵam aýyryp qalyp, jedel túrde qalaǵa jetkizý kerek boldy. Aǵamdy aýrýhanaǵa jetkizgenshe eshteńe oılaı almadym. Keshke qaraı sol kúnim qalaı ótkeni týraly oılaǵan kezde blokposttaǵy jaǵdaı esime tústi. Berik maǵan kómektesip, uzyn-sonar kólikter arasynan jyldam ótip, bizdi aýrýhanaǵa jetkizip qana qoımaı, qaıtyp ketken soń aǵamnyń densaýlyq jaǵdaıyn surap habarlasty. Onyń eńbegi jemisti bolýyn tileımin!», - dep jazdy ol Facebook paraqshasyna.
