Aqmola oblysynyń turǵyny aýyldasynyń shóbin órtep, 10 mıllıon teńge shyǵyn keltirdi
KÓKShETAÝ. QazAqparat - Aqmola oblysynda aýyldasynyń qysqa mal azyǵy retinde jınaǵan 1491 orama shóbin órtep jibergen 32 jastaǵy er adam ustaldy, dep habarlaıdy QazAqpara tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, bıylǵy jylǵy qarashanyń 3-de tańǵy saǵat 05:09-da Qorǵaljyn aýdandyq PB kezekshilik bólimine jergilikti aýyldardyń birindegi sharýa qojalyǵynyń basshysy júginip, belgisiz bireýlerdiń qysqa mal azyǵy retinde jınaǵan shóbin órtep jibergenin aıtty.
«Oqıǵa ornyna jetken jedel-tergeý toby 3 qarashaǵa qaraǵan túni belgisiz bereýlerdiń kásipkerdiń 1491 orama shóbin órtep jibergenin anyqtady. Keltirilgen shyǵyn kólemi 10 mıllıon 500 myń teńgeni qurady», - dedi vedomstvodan.
Jedel-izdestirý sharalary barysynda polıtsııa qyzmetkerleri kúdikti retinde 32 jastaǵy jergilikti turǵyndy anyqtady.
«Qazirgi ýaqytta osy oqıǵaǵa baılanysty Qylmystyq kodekstiń 202-shi babynyń 2-bóligi «bótenniń múlkin qasaqana búldirý» boıynsha sotqa deıingi tergeý sharalary júrgizilýde», - dedi vedomstvodan.
